Muhafizanê Şorişî yê Îranî eşkera kerd ke înan merkezê fermandarîya operasyonanê taybet ê DYA’yî yê herêmê EL-Tanf yê Sûrîyeyî hedef girewt û daye piro. Hêrişanê DYA’yî yê vera Îranî ser o zî şewa 6. de dewam kerd.
Muhafizanê Şorişî yê Îranî eşkera kerd ke înan merkezê fermandarîya operasyonanê taybet ê DYA’yî yê herêmê EL-Tanf yê Sûrîyeyê hedef girewt û daye piro. Medyaya dewleta Îranî dîyar kerd ke no hêriş sey cewabê hêrişo ke Îranşahrê ser o ameyo kerdene; netîceyê hêrişî de xeylî leşkerê Îranî cuya xo ra bîyî.
DYA’yî aşma sibate de eşkera kerd ke înan xo kampê El-Tanfî ra anto û kontrolê kampe teslîmî artêşa Sûrîye kerdo.
DYA’yî şewa 6. de zî hêriş kerd
Heto bîn ra, DYA’yî eşkera kerd ke şewa 6. de hêrişê xo yê hewayî Îranî ser o dewam kerdo. Fermandarîya Merkezî yê Amerîka (CENTOM) eşkera kerd ke sîstemê çimdarîya qeraxî, tesîsê pawitena hewayî, binawanîya lojîstîk a leşkerî û tesîsê deryaye zî mîyan de bi desan hedefê leşkerî piro dayê.
Îranî tehdît kerd
Îranî zî îdia kerd ke hêriş, vera sîvîlan ameyo kerdene. Verfekê artêşê Îranî vat: “Eke DYA hêriş bero binawanîya Komara îslamî ser, heme merkezê DYA yê herême, do bibê hedefê Îranî.” Bi nê hawayî derheqê hedefanê welatanê Kendawî de îqaz kerd.
Kûweyt, Qatar û Bahreyn alarm de yê
Hêzanê çekdaran ê Kûweyt û Qatarî eşkera kerd ke ewro, serê sibayî, bîyî hedefê hêrişo hewayî. Bahreyn de sîrenê hêrişê hewayî 2 rey kewt dewre.
Rayedarêko leşkerî televîzyonê dewlete ê Îranî de qisey kerd û vat ke teyareyêko bêmerdim û bombabarkerde, hedefê leşkerî ê DYA’yî yê Kuweytî daye piro.
Pakîstanî vengdayîşê muzekereyî kerd
Pakîstan ke herêmê de hewldayîşê mabênkarî keno, vengdayîşê hetan kerd ke şerî bivindarnê û newe ra dest bi muzekereyan bikerê. La sermuzekerekarê Îranî Muhammed Bakir Galibaf vat: “Peymanêk demo ke madeyê aye derbasdar bê û bêrê caardene, hîna bi mana ya.”
Qesra Sipê: Ma hema zî dîplomasîye rê akerde yê
Verfeka Qesra Sipê Karolîne Keavitt zî dîyar kerd ke Donald Trump hema zî dîplomasîye rê akerdeyo.
Badê ke Îranî hewteyo vîyarte Neqebê Hurmuzî de trafîk girewt, şîyayîş û ameyîşê keştîyan xeylî kêm bîyî. Nê semedî ra bazarê mîyanneteweyî de vayîya varîlêk petrolê brentî ewro resayo 85 dolarî.
