Verfeka DEM Partî Ayşegul Dogan derheqê çarçewaye de dîyar kerd ke ganî seba rayraberdişê prosesî Abdullah Ocalan hîna aktîf bo û wina vat: “Ganî Heyetê Teqîbkerdiş û Tespîtkerdişî tena seba bêçekerdişê nê, ganî seba rayraberdişê prosesî hîna zêde aktîf bo.”
Verfeka DEM Partî Ayşegul Dogan derheqê averşîyayîşanê peyên û prosesî de, merkezê pêroyî yê partîya xo de, kombîyayîşê çapemenîye viraşt. Ayşegul Dogan destpêke de bale ante qanûnê çarçewayî ser û vat: “Ez destpêke de qanûnê çarçewayî ser o dest bi qiseykerdişê xo bikerê. Na çarçewaye de Heyetê Teqîbkerdiş û Tespîtkerdişî ame awankerdene. Destpêkerdena xebata heyetî zaf muhîm a. No heyet ganî goreyê rewşa ewroyêne têbigêro. Rojanê ameyoxî de no heyet do senîn xebatanê xo bikero, kamcîn beşê komelî binê banê heyetî de bê, do dîyar bibo. No proses, prosesê awankerdişî yo. Ganî beşê komelî yê sîvîl tewrê heyetî bibê û xebatanê aştîye rayîrra berê. Ma qalê awankerdişê aştîya komelkî û demokratîkbîyayîşî kenê. Ganî heme beşê komelî tewrê awankerdişî bibê.”
’Ganî birêz Ocalan bieşko rolê xo bikero’
Ayşegul Dogan dîyar kerd ke seba Rayberê Şarê Kurdî Abdullah Ocalan bieşko prosesî biserûber rayra bero, ganî şert û mercê ey bêrê vurnayene, başkerdene û nê çî vatê: “Waştişê ma yê tewr muhîm no yo ke seba rayraberdişê nê prosesî, şert û mercê birêz Ocalanî bêrê başkerdene. Rewşa nikayîne ma rê nîşan dana ke ganî şert û mercê birêz Ocalanî bêrê başkerdene. Ganî tena ne bêçekbîyayîş bêro erjnayene û qiseykerdene, ganî seba way û birayîya tarîxî ya tirkan û kurdan proses bêro rayraberdene. Ganî birêz Ocalan eşkere nê prosesî rayra bero. Ma seba pêtkerdiş na way û birayîye, weqtêko tarîxî yê. Ma reyna vîr anê ke ganî ziwanêko newe bêro awankerdene û bêro qiseykerdene. Lazimîya Tirkîya nê çî esta ke aştîyêka domdare û birûmete bêro caardene. Ma her tim na vanê, nê wazenê û têkoşîn kenê. Çiqas kêmanîyê nê qanûna çarçewayî estbê zî, ganî ma pozîtîf nêzdî bibê û bivînê. No seba derbazbîyayîşê hetê huqûqî ra muhîm o.”
’Ganî ma vengê dayîkan bieşnawê’
Ayşegul Dogan vîrardişê cangorîyanê têkoşînê azadîya kurdan ke nika şaristananê Bakurê Kurdîstanî de yeno virazîyayene, vîr ard û wina vat: “Ma nika qala aştîye kenê, ganî ma çîyêke verê cû ke qewimîyayî rê bêrê têrîameyîş. Ganî ma dejanê xo têverayîş. Ma nika qala agêrayîşan kenê. Eke prosesê serra 2015î ser bikewtêni, hend merg û şînî zî nêbinî. Ganî maye û pîyê kesanê ke şer de cuya xo ra bîyî, bêrê têhet û şînê xo pîya bigêrê. Dejanê xo pîya biciwîyê. Dayîkî aştîye wazenê. Vanê ma gedeyê xo vîndî kerdî, wa gedeyê înan bibê ê peyênî. Ganî ma vengê dayîkan bieşnawê. Ganî ma bi cesaret wirzê û bi dejanê keyeyan rê bêrê têrî.”
‘Seba demokratîkbîyayîşê Sûrîye îradeyêko pîl veyîya meydan’
Ayşegul Dogan bale ante averşîyayîşanê ke Rojava-Sûrîye de qewimîyenê ser û vat: “Ma averşîyayîşanê Sûrîye nêzdî ra taqîb kenê. Averşîyayîşanê Sûrîye, Tirkîya û ê herême yewbînan ra girêdayeyê. Eke Tirkîya de aştîyêka domdare bêro caardene, do tesîrêko gird herême ser o zî bikero. Çîyê ke nika Sûrîye de yenê caardene, seba Tirkîya zî zaf muhîm ê. Seba temambîyayîşê entegrasyonî qonaxêk derbaz bî. Nika qonaxêko bîn dest pêkeno. Seba yewbîyayîşê Sûrîye no pêkerdiş, averşîyayîşêko gird o. Seba pawitena herra Sûrîye û têkoşînê vera DAIŞ’î de, Hêzê Sûrîye Demokratîk bi rolêka gird werişt. Do HSD nika zî seba averşîyayîşê demokrasîya Sûrîye zaf xebatan bikero. Mazlûm Ebdî heta nika mîyanê şer de bi, la nika endî ey îrade yê sîyasetê demokratîkî vete meydan. Birêz Ocalan seba aştîya herême kerdoxo tewr muhîm o. Çunke serrano seba aştîye têkoşîn keno. Ganî endî Mazlûm Ebdî û Îlham Ehmed bi hawayêko fermî dawetê Tirkîya bêrê kerdene.”
Kongre do bi girseyî nêro viraştene
Ayşegul Dogan bale ante viraştena kongreya DEM Partî ya asayî ser, ke do 6ê êlule de Anqara de bêro viraştene û îfade kerd ke hedrekarîya kongreya înan dewam kena û ê na kongreye bi hawayêko girseyî nêvirazê. Ayşegul Dogan dîyar kerd ke na kongreya asayî hedreyîya kongreya girde ya ke do rojanê ameyoxan de bêro viraştene.
