Dayîkan/Merdimanê Şemeyî hewteyo 1117. de aqûbeta Mehmet Gunkanî o ke 32 serrî verê cû ameyo vîndîkerdiş pers kerd û wina vat: “Leşkeran 18ê tebaxe 1994î de vengdayîşê Mehmet Gunkanî kenê. Mehmet Gunkan şino qerekole û endî tu agahî tira nêame girewtene. Aqûbeta Mehmet Gunkanî tarîye de ame verdayene.”
Dayîkanê/Merdimanê Şemeyî bi waştişê “Wa vîndî bêrê vînayene kiştoxî bêrê muhakemekerdene” hewteyo 1117. de Meydanê Galatasaray yê Stenbolî de Dayîkanê Şemeyî û xeylê pawitoxê heqanê merdiman tewrê çalakî bîyî. Çalakîye de fotografê vîndîbîyayan ameyê girewtene. Çalakîya nê hewteyî de aqûbetê Mehmet Gunkanî ê ke 32 serrî verê cû ameyo vîndîkerdene, ame perskerdiş.
Dayîka Şemeyî Yasemîn Bektaş metnê eşkerayîye wend.
‘Tewlê heme muracatan cipersayîş nêame kerdene’
Yasemîn Bektaş dîyar kerd ke ey ewro aqûbetê Mehmet Gunkanî ke 32 serrî verê cû amebî vîndîkerdene pers kerd û vat: “Mehmet Gunkan Muxtarê dewa Derno ya qezaya Hêni ya Amedî bî. Dewe de 13ê hezîrana 1994î de pêkewtişêk vejîya. Badê pêkewtişî cendirmeyan hêrişê dewe kerd û dewe veng kerde. Dewijê destbendkerdeyî berdî qertekole, badê hewteyêk dewijî ameyê veradayene. Mehmet Gunkan zî mîyanê înan de bî. Mehmet Gunkan rastê îşkenceyî amebî û wina vatbî: “Eskeran dewa ma veşna. Cendirmeyan ma berdî qerekola Topçularî û uca de ma îşkence kerdî. 430 kesî dewe ra veyîyayî. Ez ameya Anqara û hetkarî îqtîdarî ra wazena.” Mehmet Gunkan badê ke Anqara ra agêra, leşkeran 18ê tebaxa 1994 de veng dabî Mehmet Gunkanî û o zî şî qerekole endî tu agahî tira nêameye girewtene. Keyeyê ey seba aqûbetê Mehmet Gunkanî bizano muracatê heme sazgehanê dewlete kerd. Tewlê heme muracatanê keyeyî, tu cipersayîş nêame kerdene. Aqûbetê Mehmet Gunkanî tarîye de ame verdayene.”
Çalakîye bi ronayîşê qerenfîlan yê Meydanê Galatasaray qedîya.
