YRJ’yî serrgêra şehadetê rojnameger Gulîstan Tara, Hêro Behadîn û Necmedîn Sînanî de ê vîr ardî û vat: “Ma do mesajê çapemenîya azade bi israr, bi bersîyarîyêka girde û girêdayeyê şehîdanê xo reyde bê.”
Yewîyeya Resnayîşî ya Cinîyan (YRJ), seba serrgêra şehadetê rojnameger Gulîstan Tara, Hêro Behadîn û Necmedîn Sînanî eşkerayîyêk weşanaye.
Eşkerayîye de wina ame vatene:
“Bi nameyê Yewîyeya Resnayîşî ya Cinîyan (YRJ), ma bi sereberzî û dej her di pêşenganê çapemenîya azade Gulîstan Tara û Hêro Behadîne vîr anê. Hemrayîr Gulîstan û Hêro 23ê tebaxa 2024î de netîceyê hêrişê teyareyê bêmerdim ê dewleta Tirkîya ya îşxalkere vera erebeya înan de, qezaya Seydsadiq ya şaristanê Silêmanîye yê Kurdîstanî de şehîd bîyî.”
Pêşengê çapemenîya azade Gulîstan û Hêro wayîrê dewa bîyî, waştênê mîyanê hedîseyan de bê û ê hedîseyan dinya pê bidê hesnayîş, waştêne ke bibê vengê ê kesan ke bi serrano nêeşkenê vengê xo bidê hesnayîş yan dewaya xo vajê û ameyoxê xo munaqeşe bikerê.
Gulîstan Tara û Hêro Behadîn wayîrê ferasetêk bî ke problemê cinîyan tena sey babetêka haydarkerdişê nêdîyenê, sey babetêka girêdayeya ravurîyayîşê komelkî û sîyasî dîyenê û heqê cinîyan o ke bibê wayîrî qerar û bieşkê bi qerardarî hîkayeya xo binusnê. Na bawerîye ser o, kamera û qelam girewtê û têkoşînê cinîyan dayê hayîdarkerdiş. Na bawerîye de bîyî ke afirînerî û keda cinîyan hêjayo ke bêro vînayîş, eşnawitiş û belgekerdiş.
Eynî wextî de ma embaz Necmedîn Sînanî zî vîr anê ke 23ê tebaxa 2023 de, wextê wezîfeyê xo yê JIN TV’î de bicaardênê, hêrişê vera erebeya ekîbe de, rayîrî Qamişlo-Amûdê ser o şehîd kewt û eynî hêrişî de hemrayîr Delîla Egîd zî bi giranî birîndar bi.
Hêrişê vera ekîbê JIN TV û rojnameger Gulîstan Tara û Hêro Behadîn ke tarîxo ke ameyê kerdiş, tesaduf nêbi. La astê hedefgirewtişo sîstematîk ê rojnamegeranê ke wezîfeyê xo yê hayîdarkerdişî heqîqate ca anê, ano verê çiman. Sewbînan nê hêrişî tesdîq kenê ke çapemenîya azade hema zî hedefê hêzanê ke wazenê vengê azadîye bêveng bikêrê û heqîqate bitemernê de yê.
Ma sey YRJ’yî sozê xo newe kenê ke do xeta şehîdanê xo de xebata ma her game ganî bimano. Ma do cayo ke te de vinderê, bi kamera, qeleme û vengê xo rayîrê înan ser o dewam bikerê.
