Wan – Bi pêşengîya Platformê Şûbeyan yê TMMOB’î yê Wanî, serrgêra erdlerzê 23yê teşrîna verêne 2011 ser o eşkerayîyêk ame dayîş. Eşkerayîye de ame dîyarkerdiş ke badê 15 serran zî şaristan erdlerzanê neweyan rê hazir nîyo û waştişê emnîyetî yê şarî nêameyê caardiş.
Bi pêşengîya Platformê Şûbeyan yê Yewîya Odeyanê Muhendîs û Mîmaranê Tirkan (TMMOB) yê Wanî, serrgêra erdlerzê 23yê teşrîna verêne 2011 yê Wanî ser o verê heykelê erdlerzî yê Parka Akkopru de eşkerayîyêk ame dayîş. Temsîlkarê sazgehanê sivîlan, sîyasetmedar û endamê odeyan tewrê çalakîye bîyî.
Eşkerayî bi rêzegirewtiş dest pêkerd. Metnê eşkerayîye hetê Hemserekê TMMOB’î yê Wanî Ahmet Ortakî ra ame wendiş.
Dima Hemşaredarê Şaredarîya Girde ya Wanî Abdullah Zeydanî qisey kerd. Abdullah Zeydanî da zanayîş ke bi tedbîranê lazimî zerarê erdlerzan eşkeno bêro kêmîkerdiş û wina vat: “Ma nêeşkenê verê erdlerzan bigîrê la ma eşkenê tesîrê înan sewîyeya tewr cêre ser bîyarê war. Coka hem sewîyeya merkezî de hem zî sewîyeya herêmkî de bi aqlêko hempar û kolektîf ma eşkenê tesîrê erdlerzan kêmî bikerê. Ma tim no çî ard ziwan: Cayêk de ke îdareyê herêmkî tede nêyenê dîyayîş û îradeyê şarî yeno desteserkerdiş, verê felaketan nêyeno girewtiş.”
Eşkerayî badê qiseykerdişan qedîya.
