Endamê sazgehanê sîvîl û siyasetmedarê Kurdî seba şînê cangorîyanê Têgerayîşê Azadîye yê Kurdî, vengdayîşê şarê Amedî kerdê û wina vat: “Seba mîrasê cangorîyan wa şarê Amedî tewrê şînî bibê û wayîrê keyeyanê xo vejîyê.”
Bi pêşengîya MEBYA-DER’î ya Amedî, Amed de seba 49 cangorîyanê Têgerayîşê Azadîye yê Kurdî yê ke tarîxanê cîyayan de cuya xo ra bîyê, Parka Koşuyolî ya Amedî de şîn ame ronayene. Şîno ke do 3 rojî dewam bikero, dest pêkerd. Parlamenterê DEM Partî yê Amedî Mehmet Kamaç, hunermend Şêrko Kanîwar û hemserekê MEBYA-DER’î yê Amedî Ramazan Dengîz seba tewirbîyayîşê şînî vengdayîşê şarê Amedî kerd.
‘Ma pîya wayîrê şehîdan vejîyê’
Vengdayîşê tewirbîyayena vîrardişê cangorîyan de ame dîyarkerdene ke seba mîrasê cangorîyan ganî şarê Amedî wayîrê keyeyan vejîyo û wina ame vatene: “Eke ewro prosesê aştîye estbo, bi saya serê nê şehîdan esto, ganî ma zî wayîrî nê mîrasî şehîdan û keyeyê înan vejîyê. Şînê nê şehîdan de kişta keyeyanê xo de bibêni. Ma pîya wayîrê şehîdanê vejîyê.”
