Dursun Ulucan, weşîya xo Fransa de rameno, dewlete ke 1994 de dewa înan kerda tal zê 10 serrî nêeşkîyo şoro dewa xo. Des serrî ra tepîya şono dewa xo keno şen û wina vano: “Mayê ma Pîyê ma Kalikê ma nê welatî de weşîya xo ramita, ma çûtûr dewa xo de dûr vînderîme.”
Dursun Ulucan weşîye xo Fransa de rameno. Dewa Ware Wuşen Axayî ya ke giredayeyê Pilemûrîye ra yo. 1990î de bar kerdo şîyo Faransa. 1994î de Dewlete dewa înan zî zê dewanê bînan kerda tal. Zê 10 serrî bese nêkerdo şerê dewa xo. Tepîya şîyo dewa xo de bon viraşto. Her serre wisar ke ame sono dewa xo, Payîz ke ame peyser sono. Dewa xo de daranê Murîyan, daranê sayan nano ro, hegayê xo de bostan nano ro, dewa xo keno şen û raye Pîy û Kalikanê xo de sono. Dursun Ulucanî ma rê qisey kerd.
‘Welatê ma herdo Dewrêş o’
Dursun Ulucan, seba dewa xo qisey kerd û wina vat: “Namê dewa ma Warê Wuşen Axayî ya. Ez lajê Bava Hesenî yo, tornê Bava Dilî yo. Fransa de weşîye xo ramnon. 1990î de şîyane teber. 2020î de her ser yon dewa xo. 1994î de Dewlete dewê ma kerdî tal. Des serrî tepîya dewa xo de bon viraşt. Dewa pîye xo kerde şên. Welatê ma herdo dewrêş o. Îtîqatê ma verênde zaf rind bî.”
‘Dewa xo kerdane şên’
Dursun Ulucan qiseykerdîşe xo wina qedêna: “Dormê ma cayê jîyar û dîyarano. Boverê ma de Bagira Sipîye est a, nêzdîyê ma de Qizilbele est a, hetê rastî de Warê Çîmê Kanî est o, peyê ma de Koyê Qoşan est o. Seba îtîqat ser, seba cîranîye ser, Pîr û Taliban ser dormê xo kerdo şên. Welatê ma zaf rindeko, rêçê maye û pîyê ma est ê. Ma welatê xo ser zaf xerbîye kerdêne. Xeylî serrî teber de mendîme. Vazon ke nayera tepîya dewa xo de vinderî.”
