Cinîyan derheqê pêvînayîşo ke bi Rayberê PKK’yî Abdullah Ocalanî ameyo kerdiş û rolê meclîsî yê çareserîya meseleyê kurdî de qisey kerd û vat: “Ma proses ra bi hêvî yê. Ganî pêro hetî paştî bidê nê îmkanê tarîxî.”
Badê pêvînayîşê de ke heyetê Partîya Têduştî û Demokrasîyî ya Şaran (DEM Partî) Rayberê PKK’yî Abdullah Ocalanî reyde kerdo, munaqeşeyê derheqê çareserîya demokratîke ya meseleyê kurdî dewam kenê. Mesajê Abdullah Ocalanî hetê heme hetan ra pozîtîf ame vîna yene û sewbîna semedê çareserî zî yew zemînê muhîm yê TBMM’yî amebi mojnayene. Cinîyan derheqê babete de û rolê meclîsî de erjnayîş kerd.
Sîyasetmedar Arzu Firate bale ant vatişê Devlet Bahçelîyî ke ‘wa Abdullah Ocalan bêro meclîsî de qisey bikero’ ser o û vat: “Vengdayîşêko winasîn semedê çareserîya meseleyê kurdî muhîm o. Badê nê pêvînayîşê ke Birêz Ocalanî reyde ameyî kerdiş û deklerasyono ke 7 madeyan ra pê ameyêne, semedê dîyalog û muzakereyî muhîm bi. Bêşik eynî wextî de meclîs zî semedê çareserî zemînêko muhîm o. Semedê çareserî dîyalog muhîm o. Ganî hetê komelê zî tewrê prosesî bibê. No semedê ma muhîm o.”
‘Şer û cinî’
Arzu Firate bale ant şer û pêrodayîşan ser o û dîyar kerd ke yê ke tewr zaf mexdûr benê cinî yê û wina vat: “Şer netîceya zîhnîyetê serdestî yê camêrdî de vejîyeno orte. Yê ke şerî ra tewr zaf zirar vînenê cinî yê. Nê semedî ra cinî benê kerdoxê na aştî. Eke aştîyêk awan biba ganî bi têkoşînê ke cinî kenê awan bibo.”
Îmkanê tarîxî
Arzu Firate tewr peyên de wina vat: “Lazim o no îmkano tarîxî baş bêro erjnayîş. Cinî nêmeyê komelî awan kenê. Cinîyê kurdî û cinîyê tirkî wayîrê têkoşînêkê hempar ê. Lazim o no prosesê aştî bibo komelkî û pêro beşê komelî tewrê nê prosesî bibê. Semedo ke na babete pêro komelî eleqedar kena lazim o pêro beşî komelî na babete de wayîrê helwestî bê. Lazim o her kes bi vatişê xo tîya de bo û bi waştişê xo beşdarê nê prosesî bibo. Tena eke wina bo, ma eşkenê aştîya komelî awan bikerê. Ma nê çî ra hêvîdar ê û ma qerardar ê ke têkoşînê xo yê aştî dewam bikerê.”
‘Barê ma giran o rayîrê ma derg o la ma bi hêvî yê’
Endama Meclîsê Cinîyan a HDK’yî Gulşen Daşdogan zî wina vat: “Têsîrê şerî de ewil cinî û gedeyî manenê. Coka aştî waştişê ma heme cinîyan o. Ma vengdayîşê Baxçelîyê ke yê 7ê teşrîna verêne de kerd, muhîm vînenê. La qîm nêkeno. Semedo ke no proses zemînê destûrê bingehînî de bêro ronayene. Seba ke ma nê prosesî bikerê prosesê komelkî ganî ma kuçe bi kuçe, tax bi taxe bigêrê. Ma cinî ewle de nîyê. Her roje cinî yenê qetilkerdiş. Cinî tewr zêde mîyanê keyeyî de şîdet vînenê. Barê ma giran o, rayîrê ma derg o la ma bi hêvî yê. Ganî herkes zerrî ra bo û zerrî ra gaman bierzo. Ganî her kes paştî bido prosesê aştîye.”
