Fîlozofa Îtalî Donatella Di Cesare, mektubeke daye Heyetê Îmralî seba ke biresnê Rayberê Şarê Kurdî Abdullah Ocalanî û mektube xo de vat ke hêvîya aştî û azadîya Ocalanî yewbînan ra nêna cîyakerdene.
Fîlozofa Îtalî Donatella Di Cesare, vengdayîşê Aştî û Komelê Demokratîk ke 27ê sibata 2025î ke hetê Rayber Abdullah Ocalanî ra amebî kerdene, piştîdayîşê xo seba prosesî eşkera kerd. Fîlozofa Îtalî mektubeke daye Heyetê Îmralî seba ke biresnê Rayber Apo.
Fîlozofa Îtalî Donatella Di Cesare, mektubê xo de dîyar kerd ke nê têkoşînî û fikrê Abdullah Ocalanî nêzdî ra teqîb kena û wina vat: “Wextêko derg bi ke mi waşt to rê binusnî; seba ez eşkena nê nika bikerî, no çî tesîrêko gird mi ser o keno. Nameyê to parçeyêko muhîm ê cuya min ê sîyasî û entelektuelî de ca girewt. Îtalya de seba mi, seba xeylî kesan ti qet nêbî fîgureko beyaxkî û dûrî. Ma bi heyranî, fikir û hîsanê piştîdayîşê têkoşînê to, girewtişê to, fikrê to û têkoşînê şarê kurdî teqîp kenê.
Mi her game xo nêzdî şarê kurdî hîs kerd. Têkoşîno demderg ê seba azadî, rûmet û naskerdişî, seba mi bî yew meseleyêka sîyasî yê tewr muhîm ê dewrê ma û nameyê to na babete ra qet nêno visnayîş. Çîyêko badê serran zî mi ser o tesîrêko gird kerd, girewtişê to yê Îmralî û taybetî zî tecrîdo ke to ser o ameyene kerdene, bi.
Xeylê zehmet o ke merdim girewtişê to yê zêdeyî 27 serran ser o bifikirîyo. Tecrîd, girewtişî ra zî zehmetêr o; o qutkerdişê têkîlîya merdimêkî bi dinya rê, mehrumkerdişê ey veng û qiseykerdiş û hewildayîşê qutkerdişê fikrî komelkî ra. La rixmê nê caardişan, vengê to nêame birnayîş. Çîyo ke her game mi ser o tesîr kerdêni no bi. Mîyanê şertanê ke waştêni to dinya ra bivisnê de, fikrê to girawe ra vila bîyî; ameyê û qebulkerdene. Tu hepîsxane nêeşkeno vernîya vilabîyayîşê vatişanê to de bibo asteng.
Nê semedî ra, ez wazena çîyêko xeylî taybet û şexsî to ra vajî: hende serrî yo ke ti seba mi bîyî fîgurêko xeylî muhîm. Ne tena xoverdayîşê to ver, sewbîna têkoşînê to yo sîyasî ver, kapasîteya xo ya newe ra fikirîyayîşî, ez bîya heyranê fikrê to. Ez bîya heyranê cipersayîşê to yo îqtîdaro bandure, netewe-dewlet û netewperestî; ez bîya heyranê cigêrayîşê to yê cuyêka demokratîk ya pîya rê.
Nê persî xeylî nêzdî karê mi ê felsefî yê. Gelo ti senî eşkenê komelêko ke mîyanê sînoranê nasnameyî de asê nêbîyê xeyal bikerê? Şarê cîyayî mîyanê atmosferêko sîyasî yo hempar ke ê bînî ser o bandure nêbo, senîn eşkenê pîya biciwîyê? Merdim senîn eşkeno teberê bandurî de, sînoran û teberdeverdişê demokrasîye de bifikirîyo? Nê persî ewro her wextî ra zêdeyêr muhîm û acîl ê.
