DÊRSİM— Endama Federasyonê Yewîneyanê Elewîyan ê Fransa, Ocaxa Dervîş Cemalî ra Fîraz Yalvaç, zîyara pîroze ya Munzur Babayî de derheqê bawerî, ziwan, nasnema û kulturî de qisey kerd û vat: “Pawitişê nasnameyî pawitişê ziwan û zîyaranê pîrozî ra derbaz beno.”
Endama Federasyonê Yewîneyanê Elewîyan ê Fransa, Ocaxa Dervîş Cemalî ra Fîraz Yalvaç, zîyara pîrozê Munzur Babayî de derheqê bawerî, ziwan, nasname û kulturî de qisey kerd. Fîraz Yalvaçe ya ke 8 serrî ya xo de Dersimî ra şîya Fransa, dîyar kerd ke tewlê serranê surgunî zî a ziwanê xo û bawerîya Elewî-Qizilbaşî xo ra nêbîya.
‘Ma Fransa de zî ziwan, bawerî û welatê xo ra nêbîyê’
Fîraz Yalvaç dîyar kerd ke Fransa de wendişê xo qedênayo û serranê ciwanîya xo ra heta ewro xizmetê komelî de cayê xo girewta; wazena bêpîr u bêocaxê zî Raya Heqî de xizmet bikero. Fîraz Yalvaçe qisêkerdişê xo de bale ante pîrozîya çira û ziwanî ser û wina vat: “Ma raya xo kitaban ra yan zî xocan ra nê, roşnîya çilayî ra musayî. Ma keyeyê xo de bi emeg û rizqê xo çila taviste û adirê ay de pîl bîyî. Ma Fransa de zî ziwan, bawerî û welatê xo ra nêbîyî.”
‘Pawitişê nasnameyî pawitişê ziwan û zîyaranê pîrozî ra derbaz beno’
Fîraz Yalvaçe agêrayo serê hardê xo û zîyaranê Elewîyan ê pîrozan sey Munzur Baba, Duzgun Baba û Ana Fatma zîyaret kerdê û vat: “Ma duaya xo kerdê, sole rişna, çilayî tafîna û niyaz vila kerd. Tena seba însanan duayanê xo nêkenê, seba milçikan, kerayan, erdan û pêro cîranan xo kenê.”
Fîraz Yalvaçî bale ante dûrkewtişê neslanê neweyan ê ziwan û kulturî ser û wina vat: “Vengdayîşê mi heme komelî rê yo: Pawitişê nasnameyî tena pawitişê ziwan û ziyaranê pîrozî ra derbas bena. Ekê ma rojêk ziwanê xo, zîyaran û erdê xo yê pîrozan xo vîr ra bikerê, ma nêeşkenê xo tarif bikerê; kes zî ma nasnêkeno. Ma ganî kokê xo ra, ziwanê xo ra û raya xo ra dûrî nêkewê.”
