Hêrîşê teyaraya bêmerdimî yo ke serê herêma Moskova ya Rusya de ame kerdene de, 5 kesî merdî û 6 kesî zî birîndar bîyî.
Hêrîşî ra dima herêma endustrî de şewat vejîya. Rusya û Ukrayna hêrîşê xo yê hewayî yê vera yewbînî domnenê. Goreyê xebera ANFî; hêrîşê teyaraya bêmerdimî yo ke nêzdîyê Moskova ya paytextê Rusya de ame kerdene de 5 kesî cuya xo ra bîyê û 6 kesî zî birîndar bîyî.
Walîyê Moskova Andrey Vorobyov hesabê xo yê Telegramî ser o eşkerayî da û dîyar kerd ke sîstemê înan ê pawitişê hewayî hêrîşê teyarayanê bêmerdimî yê serê herêmê asteng kerdo, la herêma endustrî ya Novoselki de seba ke teyara tayê noqteyan de pirodayo, şewat vejîyayo. Vorobyovî diyar kerd ke hêrîşê serê herêma endustrî de 5 kesan cuya xo vîndî kerda û 6 kesî zî birîndar bîyî.
Rayedaranê Rusya eşkera kerd ke herêma Lenîngradî de 17 teyarayê bêmerdimî ameyê vistene. Rîyê hêrîşî ra tesîsê lojîstîkî yê fîrmaya e-bazirganîye Wildberriesî de şewat vejîyayo.
Hetê Ukrayna ra zî Walîyê Herêma Sumî Oleg Grygorovî dîyar kerd ke semedê hêrişê hewayî yê artêşa Rusya, saetena şewe de 2 gedeyî û kalê ke cuya xo ra bîyî. Grygorrovî îşaret kerd ke cenazaya 2 gedeyanê kênakan, binê xirbanê bananê rijîyayan ra ameyî vetene.
Ame zanayene ke şaristanê Hersonî zî pêroyî şewe hetê hêzanê Rusya ra hêrişî ameyê kerdene, nê hêrişan de sivîlêke 52 serre birîndar bîyo. Hêrişê hewayî yê mabênê Rusya û Ukrayna de hewteyê peyînan de zêde bîyê.
