Meclîsê Cînîyan ê DEM Partî, seba serrgêra hêrişanê qirkerdişî yê 3yê Tebaxa 2014î yê vera êzidîyan eşkerayîyêk daye û vat: “Seba vînayîşê cinî û domananê êzidîyan, muhakemekerdişê faîlan û statuyê Şengalî ma do têkoşînê xo berz bikerê.”
Meclîsê Cînîyan ê DEM Partî eşkerayîya xo de wina vat: “Vera Fermanê 74î, ma cuya newa silam kenê ke bi pêşengîya cînîyanê Şengalî ameya awankerdiş. Komelê êzidî, verî ra heta ewro binê hêrişanê qirkerdişî yê hêzanê serdestan de bîya. Fermano 74 o ke 3yê Tebaxa 2014î de hetê çeteyanê DAÎŞ’î ra ame kerdene, estbîyayîşê êzidîyan û Şengalî serê erdî ra pakkerdiş kerdbi hedef.
Nê qirkerdişî de ke bi hezaran êzidîyî ameyî qetilkerdene, hedefo tewr pîl cînî bîyî. Hêrişan de bi hezaran cînî pazaranê koleyan de ameyî rotiş û qetilkerdiş. Serrgêra 12. ya qirkerdişî de ke vera estbîyayîş û bawerîya şarêkî ame kerdene, ma ê ke ganê xo da bi hurmet yad kenê.
Ma reyna soz danê ke ma do seba heq û cuya bi hezaran cînîyan ê ke aqubetê înan nêyena zanayene têkoşînê xo pîl bikerê. Ma hêzanê ke wazenê qirkerdişî bi babetanê bînan bidomnê hişyar kenê. Karê zelal ê şarê êzidî û cînîyan ê êzidîyan ver de şima do bin bikewê.
Tarîxê komelê êzidîyan, vera fermanan tarîxê estbîyayîş û xoverdayîşî yo. Têkoînê cînîyan ê êzidîyan ê vera çeteyanê DAÎŞ’î, eynî wextî de vera serdestîya camêrdî, kolonyalîzm û şîdetî têkoşînê azadîye yo. Cuya newa ya ke Şengal de bi pêşengîya cînîyan ameyo awankerdiş, vera qirkerdişî xoverdayîş, îradeyê têduşt û azad awankerdiş û cuya demokratîk nîşaneyo tewr pîl a.
Serrgêra 12. ya qirkerdişî de; bi sloganê “Seba Edalet û Azadîye – Tî zî Bibe Vengê Esîranê Fermanî” kampanyaya mîyanneteweyî ya ke hetê cînîyan ê êzidîyan ra ameya destpêkerdene ma paştî danê ci, wazenê na kampanya rê wayîr vejînê û pişgtirîya xo pîl kenê.
Seba cînî û domananê êzidîyan ê ke aqubetê înan nêyeno zanayene, muhakemekerdişê faîlan, statuyê Şengalî ma reyna soz danê ke ma do têkoşînê berz bikerê.
Ma vengdayîşê xo yê ke 3yê Tebaxe sey ‘Roja Çalakî ya Mîyanneteweyî ya Vera Qirkerdişê Cînîyan û Qirkerdişî’ bêro qebulkerdene, reyna tekrar kenê.”
