Çarçewaya Festîvala Kultur û Xoza ya Munzurî ya 24. de Kuçeye Hunerî de panel ame viraştiş. Panel de vîr, tarîx û kulturê xo rê wayîrvejîyayîş ser o qiseykerdişî ameyê kerdiş.
Festîvala Kultur û Xoza ya Munzurî ya 24. roja diyîne bi sloganê “Seba Vîr û Cuya Azade; Ma Xoza, Ziwan, Kultur û Bawerîya xo rê Wayîr Vejîyenê” merkezê Dêrsim de bi panelan dewam keno. Panel bi sloganê, “Ziwanê xo îtaqatê xo û rêça xo xo vîr ra meke” ame viraştane. Panelo ke Merkezê Cigêrayîşî yê Dêrsimî de bi moderatorîya nuştox Selman Yeşîlgozî ameye kerdiş, Serekê Komeleya Elewîyanê Demokratîkî (DAD) Zeynel Kete, Serekê Federasyonê Elewî Bektaşîyan (ABF) Mustafa Aslan, Hemverfeka Komîsyonê Ziwan, Kultur û Hunerî ya DEM Partî Cemîle Turhalli Balsak û cigerayox – nuştox Turabî Saltik sey qiseykerdox beşdar bîyê.
‘Tarîxê elewîyan qirkerdiş reyde vîyart’
Turabî Yildizî elewîyan ser o qisey kerd û wina vat: ”Tarîxê Dêrsim, tarîxê bindestî yo. Dêrsim, Osmanlî ra nat xeylê seferî dîyê. Îtîqatê Kirmancîye nas nêkerd. Şarê elewî xeylê dej dî. Şare elewî dormeyê ocaxe de ameyê pêser, îtîqate xo ramit.’
‘Zon û îtîqatê xo rê wayîr vejîme’
Cemîle Turhalli qisey kerd û wina vat: “Wazenê ke îtîqat û zonê ma, destê ma ra bigîrê. Asîmîlasyonê elewî heta nika ame. Medenîyetê dewlete ma rê rindîye nêard. Ma tena xozaya xo rê nê, zonê xo rê kî wayîr vejîme.”
‘Paşt bidîme jûbînî’
Mustefa Aslan wina vat: “Şare elewî seba îtîqatê xo cayê xo vurna. Kesî elewîyî nas nêkerdê. Ma paştî bîderîme jûbînî, ma nas bikerê. Sazgehê elewîyan ganî paştî bidê jûbînî. Dewlete wazena ke rayîrê ma bivurna. Îtîqatê xo rê wayîr vejîme.”
‘Dêrsim hardê dewrêşî yo’
Zeynel Keteyî qiseykerdişê xo de wina vano: “Dêrsim heta nika, îtîqatê xo rê, zon û kulturê xo rê wayîr vejîyayo. Zonê ma, kulturê ma est o. Rayîrê ma rayîrê heqî yo. Se bikerê zî, ma dewaya xo ra vazgeç nêbenîme. Mekanê jîyarê ma kerd xirabin, ma zaf heşîrîye dîye. No welat cayêde heqîqetî yo.”
