Qezaya Hewagî ya Rihayî, xebata “Bostanê Cinîyan” ke aşma nîsane de hetê Şaredarîya Hewagî ra bi amadekerdişê erdî dest pêkerdbî, bi fehmê keda komunal û rêxistinîya komelî her ke şino hîra bena. Na qade tena sey hêgayê ramitişî nîya; bîya merkezê rêxistinbîyayîşê ekonomî û cuya hempare.
Şaaristan û qezayanê vakûrê Kurdîstanî de rez û bostanê cinîyan vila benê. Nê merkezan ra yew zî qezaya Hewagî ya Riha ya. Şaredarîya Hewagî aşma nîsane de erdêk seba Bostanê Cinîyan amade kerd û bi amadekerdişê erdî dest bi xebate kerd. No bostan bi fehmê keda komunale û rêxistinbîyayîşê komelî hîra beno. Qonaxo yewîn de berhemê sey firingî, îsot, bamye, acûr û kundirî ameybî ronayene. Cinîyê ke destpêkê mewsîmî ra heta nika bi destê xo erd amade kenê, bi rêbazanê ekolojîkî awe danê û miqateyê bostanî benê, nika zî xebatêka zafhetin kênê. Cinî hetêk ra berhemê ke ronayê, înan arê danê, hetê bin ra zî seba seferêka newe verê xo danê erdî û ramitişê berhemanê sey îsot, kundir û fasulyeyan kenê.
10 cinîyan dest pêkerd
Rêxistinbîyayîşê bostanî de sere de 10 cinîyê qeza ameyî têhet û na hûmare roje bi roje zêde bena. Cinîyê ke tîya de xebitîyenê dîyar kenê ke no bostan tena cayê ramitişî nîyo; eynî demî de îmkanêko muhîm o ke cinî keda xo bi dest fînê, hetê ekonomî ra lînganê xo ser o vinderê û piştîpêdayîşê cinîyan xurt bikerê. Bi nê modelî hem vera krîzê ekonomîkî pawitişêko komunal yeno kerdiş, hem zî erjê keda cinîyan a nêasaya komel de vejîyeno orte.
Cinîyan berhemî arê dayî
Bi nê proje yeno amanckerdene ke kulturê berardişê kolektîfê mîyanê cinîyan de vila bibo, piştîpêdayîşê komunal bibo bingeyê cuye û torra ekonomîya pêroyê şarê Hewagî xurt biba. Cinîyê ke bi kêfêko pîl bostan de ameyî têhet, îsot, fasulye û kundirî arê dayî û dîyar kerd ke ê do bi keda xo pawitişê erd û berhemanê xo bidomnê.
