Hemşaredarê Şaredarîya Amedî ya Şaristanê Girdî Serra Bucak û Dogan hatun, seba cezaya hepsî ya 3 serrî û 9 aşmî ke Hemşaredarê Şaredarîya Wanî ya Şaristanê Girdî Abdullah Zeydanî rê ameya dayene zîyaretê piştîdayîşî kerd.
Bucak, vera awanîya xizmetî ya Şaredarîya Şaristanê Girdî de hetê Hemşaredare Neslihan Şedal ra ameye qebulkerdene û aye rê vilikî pêşkêş kerdî. Hemşaredare Bucak şarê ke vernîya awanîya şaredarîye de vera tayînkerdişê qeyûmî nobete gêno, silamê xo dayî.
Hatun: Vindertişê şima cewabêko zaf xurt dano
Hemşaredar Dogan Hatunî nobedarîye de qisey kerd û va ke a selamê heme şarê Amedî ardî û wina dewam kerd: “Îradeyê kurdan pêro nika tîya der o. Şar wayîrê îradeyê xo vejîyeno, vindertişê şima yê tîya de cewabêko zaf xurt dano. Vengê şima şêro înan: Seke 31ê adare de nê şarî senî cewab da înan, senî wayîrê erdê xo vejîya, senî wayîrê ziwanê xo vejîya, senî wayîrê kulturê xo vejîya, ewro zî wayîrê îradeyê xo vejîyeno. Bi seyan rey weş û war bê. Eke şarê kurdî seba îradeyê xo werzo pay, qet yew hêz nêeşkeno vera ey de vindero. Şima weş zanê şima vera xover dayo, reyna xover danê. Wa ancîna bizanê ke şarê kurdî heme bajaranê xo de ancîya do xover bido.”
Hemşaredarê Şaredarîya Amedî ya Şaristanê Girdî Serra Bucak û Dogan Hatun, do beşdarê beyanatî bibê ke saete 12:00 de vernîya şaredarîye de yeno dayene.
