DÊRSIM – Mamosteyo İxrackerde Hasan Alî Kiliç derheqê prosesê Aştî û Komelê Demokratîkî de vengdayîşê dewlete kerd û vat: “Ganî qanûnêk seba mexduranê KHK’yî bêro viraştene ke, kesê ke bi KHK’yî îxrac bîyî, agêrê karê xo ser. Nê welatî de heme şararn rê aştî û huqûq lazim o.”
Prosesê Aştî û Komelê Demokratîk ke rojevo bingeyîn ê Vakurê Kurdîstanî û Tirkîya de, paweyê averşîyayîşanê muhîmî yê. Şarê kurdî seba prosesî her roj waştişanê xo ano ziwan, edalet û huqûq wazeno. Vera bêhuqûqîya dewlete têkoşînê kesan û komelî dewan kenê. Nê kesen ra yew zî mamoste Hasan Alî Kiliç ke bi KHK’yî kar ra ameyo vetene ajansê ma rê (AW) qisey kerd.
‘Ma verê dewlete de çok nênanêro, apey game nêerzenê’
Hasan Alî Kiliç 37 serrî yo ke mamoste yo; 10 serrî yo ke îxrac bîyo û wina vat: “37 serran de dewlete mi ra nêvat ‘To xetayêke kerda’, tu sucê mi çînê bi. Mi ser o dewayêke zî nêakerd. 37 serran ra tepîya, bi KHK’yî kayêk viraşt. Seba ke ez îxrac kerda, waşt ke ez heqîqetê kurdan nêvajî. Xora partîya AKP‘yî heq û huqûq ra zaf dûrî ya. Seba ney zî ma AKP‘yî ra hes nêkerdêni. Serra 2017î de bi hawayêko bêhuqûq, bêwijdan û bêmerhamet ma kar ra vetê. Ma kar ra vetî ke ma verê înan de secde bikerê û çok ronê, ya zî heqîqetê xo ra gamêke tepîya bierzê. Ma zî eksê cî; heqîqetê xo, zonê xo, îtîqadê xo, xozayê xo û tarîxê xo 10 qatî zêdeyêr aver berd. Ma hem verê înan de çok nêrona, hem zî gamêke tepîya nêeşt.”
“Ê ke bi KHK’yî îxrac bîyê, ganî reyna agêrê karê xo”
Hasan Alî Kiliç bale ante prosesê aştîye ser o û vat: “Ma nê prosesî ke welatê ma de dest pê kerdo, bi kêfweşî pêşwazî kenê. Ma wazenê ke demêko nêzdî de aştî bêro ca. No waştişêko merdimî yo; ciwanê ma seba aştîye, biratîye û weşîye ganê xo da. Ma se kerd, înan destê ma ra girewt. Înan ez kar ra veta, la qet xemê de nîyo. Ewro qalê aştîye kenê, ganî goreyê aye prosesî rayra berê. Ganî seba mexduranê KHK’yî qanûnêko demokratîk û raşt bêro viraştene. Çunke bêhuqûq, bêedalet û bêwijdan ma kar ra vetî. Ganî qanûnêk bêro viraştene; ê ke bi KHK’yî îxrac bîyê, ganî reyna agêrê karê xo. Welatê ma de ganî demokrasîye bibo. Nê welatî de heme şaran rê aştî û huqûq lazim o.”
