Serekê Amerîka Donald Trumpî dîyar kerd Îran goreyê pêkerdişî tênêgêrayo û wina vat: “Peymane de ma vatbi ke ganî çekê nukleerî çin bê, înan zî vat temam. Nika zî vanê çîyêko winayîn çin o. Aye ra zî ez vana her çî qedîyayo.”
Serekê Amerîka Donald Trump û Sekreterê Pêroyî yê NATO’yî Mark Rutte ke seba Zîrweyê NATO’yî Anqara de yê, Qesra Serekkomarîye ya Tirkîya de eşkerayî daye çapemenî.
Rexneyê vera welatanê Ewropa
Trumpî dîyar kerd ke çekê nukleerî Îraq de bîyê sebebê felaketanê girdan û aye ra zî ganî Îran wayîrê nukleerî nêbo. Trumpî vat ke înan serekê Îranî meydan ra wedarnayê û wina qisey kerd: “Ez seba NATO’yî zaf keyfweş nîya. Mi helwêstê înan ê seba NATO’yî nêecibna. Ez hewcedarê hetkarîya înan nîya. Ma helwêstê Fransa, Îtalya û Almanya nêecibna. Ez nika ra dima nêwazena Fransa reyde bazirganî zî bikera. Îspanya hemkarêka xirab a. Ne pere danê ne zî tewrê çîyêk benê. Ez nêwazena Îspanya reyde hemkarî bikerî. Seba aye zî hewce nêkeno paştîya ma reyde gird bibê. Ez do înan reyde bazarganî vindarna û bazirganî nêkera. Îspanya do nika biwazo ma înan reyde bazirganî bikerê la ma nêkenê. Ma seba înan hende pere xerc kerd la înan seba ma çîyêk nêkerd.”
Mark Rutteyî zî bale ante hêrişanê serê Îranî û nê çîyî vat: “Ganî nukleerê Îranî çin bo. Cewabê Amerîka yê vera hêrişanê Îranî ca de bi. Ewropa seba xurtkerdişê hêzanê Amerîka mekanîzmayêk a.”
‘Adirbest qedîya’
Trumpî persê rojnamegeran ser o dîyar kerd ke mutabakatê adirbestî Îranî reyde qedîyayo û wina vat: “Merdimê nêweşî Îranî îdare kenê. Ma pêkerdişêk kerd. Peymane de ma vat ke nukleer do nêbo. Înan zî vat temam. Nika zî vanê çîyêko winayîn çin o. Aye ra zî ez vana her çîyî qedîyayo. Adirbest qedîya, no rejîm zûreker o û merdimê xirab ê. Tirkîya dewletêka xurt a. Eşkayêne bikewtêne şer la nêkewte şer. Eke bikewtêne şer do hetê bînî de ca bigirewtêne. Seba aye zî ma reyde tekilîyê xo rind aver berdî.”
