Verfeka TJA ya Êlihî Havva Can dîyar kerd ke ê do vera kerdişanê lêminan ê ke Merkezê Rehabîlîtasyonê Taybet ê Şîfayî yê Êlihî de qewimîyayî têkoşînê xo bidomnê û vat: “Ma sey TJA qerar da; encam çi beno wa bibo, ma do nê hedîseyî ser o vinderî heta ke na hedîse zelale biba.”
Mîyanê nê demanê peyênan de Merkezê Rehabîlîtasyonê Taybet ê Şîfayî yê Êlihî de vera kesanê astengdaran, extîyar û domanan xeylê kerdişê lêminî yê sey tacîz, tecawuz û îşkenceyanê giran ameybî kerdene. Dima ra ke na rastîye vejîyaye, Walîtiya Êlihî û dozgerîye herinda ke berpirsîyaran vejê orte, kewtî mîyanê cehdê nimitişê nê hedîseyî.
Têgêrayîşê Cinîyanê Azadan (TJA) wexto ke qezaya Hezoyî ya Êlihî de serê hedîseyêka tecawuzî cigêrayîş kerdêne, raştê na rastîye zî ameyî. TJA seba roşnîkerdişê hedîseyî dest bi çalakîyanê sey rayraşîyayîş û nobeta roniştîşî kerd. Peynîya nê çalakîyan de, zafê keyeyê mexduran seba gerrekerdişî muracatê Şubeyê ÎHDya Êlihî kerd. Dima ra ame zanayîş ke 4 kesan bi îşkenceyanê giran cuya xo ra bîyê, 16 kesî ameyê girewtiş û zafê înan rê zî dewa ameya akerdiş.
‘Ma do taqîbkerdoxê nê hedîseyî bîbî’
Verfeka TJA Havva Can derheqê hedîseyî de eşkera kerd ke aşma teşrîna verêne 2025î de zî derheqê nê merkezî de gerrekerdiş amebi kerdene, la qet kontrol nêbîyo. Havva Can vat: “Çîyê ke serranê 80yî de Hepisxaneyê Amedî de qewimîyaybî, nika zî nê merkezî de yenî kerdene. Hîşê camêrdê îqtîdarî xo tede ferz kerdo. Walî û dozgerî pêro zî nê çîyan zanayêne. Ma do her tim dimayê nê kerdişanê Walî û dozgerî bibê.”
‘Keyeyan ser o teda û tehdîtî est ê’
Havva Can dîyar kerd ke dima ra çalakîyanê înan, zafê keyeyanê mexduran ters û tehdîtan ra nêeşkenî bi cesaret gaman bierza û vat: “Qada ke rêxistinbîyayîş tede est o, pawitişê zî tede garantî beno. Dewlete vera şarê xo şerêko taybet rayra bena. Dewleta ke hedîseyê Narîn Guran zelal nêkerda, nê çîyan ser zî nêvindena. Sey mergê Gulîstan Doku zî ma her roje vêngê xo berz bikerê.”
Havva Can qiseykerdişê xo nê vatişan qedîna: “Hewceyo ke her kuçe, taxe û dewa xo û dormeyê xo bipawê. Ganî ma nê çîyanê lêminan mîyanê xo ra bivejê. Ganî ma paweyê kesî nêvinderê, seba ke kes ma nêxelisneno.”
