Goreyê daneyanê îtfaîya Hesekê, mabênê 24ê gulane û 26ê hezîrane de 262 şewatê ke bejayîyê herêma şaristananê Rojavayî Hesekê, Til Temir, Zirgan û Dirbêsiyê de vejîya zafê ci 1.795 donimî genim û 999 donim cew, temamî ci 33 hezar û 16 donim erazîyê zîretî veşayo.
Tesîrê germê hamnanî her hetê Kurdîstanî de şewatan vejeno. Nê cayan ra yew zî Rojava yo û nê hewteyanê pêyênan de zaf herêmanê Rojavayî ra xeberê şewatî yenê.
33 hezar û 16 donimî erezîyê zîretî vaşa
Goreyê Ajansê Xeberan ê Hawarî (ANHA) destpêkerdişê hamnanî ra nat herêma şariştananê Hesekê, Til Temir, Zirgan û Dirbêsiyê de 33 hezar û 16 donimî erezîyê zîretî veşayo. Goreyê daneyanê îtfaîya Hesekê nê erazîyan ra 1.795 donimê xo hêgayê genimî û 999 donim zî yê cewî yo.
Yew aşma peyêne de 262 şewatî vejîyayî
Daneyanê Îtfaîya Hesekê de ame eşkerakerdene ke mabênê tarîxanê 24ê gulane û 26 hezîrane de 262 şewatî bîyî. Nê şewatan de 115 donimî vaş o huşk, 3 wesayîtî, 2 trafoyê elektrîkî, 1 çadire, 3 dikanî, 2 donimî darê zeytunan, 22 darê meyweyan, 8 keyeyî û 8 cayê çopî veşayê.
Vera nê şewatan têkoşînê hewnakerdişî de 20 merkezan de 40 komanê îtfaîya hedre ameyê vindetene û nînan mudexeleyê şewatan kerdo. Heto bîn ra bê nê ekîban şarê Rojavayî û hêzanê leşkerîyan zî hewnakerdişê nê şewatan de cayê xo girewto.
Şaristanê Hesekê û derûdorê ci de, ekîbê îtfaîya Hitîn, Zênar, El Xas, Raya M4î, Til Bêder, El Şûr, Til Mecdel, El Sêker, Zirgan, Dirbêsîyê, Til Temir, El Isafîyê, El Xerîta, Sedîq, Sefîya û Til Mensûr de merkezê mudexeleyî yê şewatî akerdê û seba nê karî amede yê.
