Wan – Sîyasetmedaranê Wanî vengdayîşê tewrê Mitîngê Azadîye kerd û vat: “Mitîng seba azadîya Rayberê Şarê Kurdî, girewteyanê sîyasî û şarê kurdî zaf muhîm o. Do mîtîng bibo cewabê prosesî.”
Bi pêşengiya DEM Partî, DBP û TJA’yî de seba azadîya fîzîkî ya Rayberê Şarê Kurdî Abdullah Ocalanî 27ê hezîrane de Wan û Mêrsîn de û 28ê hezîrane de zî Amed û Stenbol de bi sloganê “Bi Rayberîya Azad Ver Bi Azadîye Ra” mîtîngî bêrê viraştene. Mîtîngê Wanî, do Meydanê Newrozî yê verê Kelaya Wanî ya qezaya Raya Armuşî de bêro viraştene û hemserekê Pêroyî yê DBP’yî Keskîn Bayindir, aktîvîsta TJA’yî Sebahat Tuncel tewrê mîtîngî bibê. Do Koma Amed, rapbêj Sîmyager û Beser Şahîne zî sey hunermend mîtîng de vejîyê sehneyî ser.
Sîyasetmedaranê Wanî amancê mîtîngî ser qisey kerd û seba tewrbîyayene vengdayîşê welatijan kerd.
‘Ganî qanûnî bêrê vetene’
Hemserekê DEM Partî yê Wanî Veysî Dîlekçî ard ziwan ke amancê nê mîtîngî azadîya fizîkî ya Rayberê Şarê Kurdî Abdullah Ocalan û vetişê qanûnanê bingeyînan yê demokratîk ê. Veysî Dîlekçî vat: “Di 27ê sibate ya serra 2025î de bi pêşengîya Rayberê Şarê Kurdî birêz Abdullah Ocalanî de vengdayîşê aştî û komelê demokratîkî prosesêk dest pêkerd. Bi nê vengdayîşî xeylê gamê muhîmî ameyê eştene, PKK’yî gelêke qerarî girewtî û badê nê qeraran ganî hetê dewlete ra zî gamî bêrê eştene. Naye ra ser meclîsê Tirkîya de komîsyonêk ame ronayene, nê komîsyonî birêz Ocalanî reyde pêvînayîş viraşt û badê nê pêvînayîşî raporêk ame hedrekerdene. Seba proses başêr rayîr şoro ganî bilez hinî qanûnê bingeyînî bêrê vetene. Tewr peynî de birêz Ocalan seba viraştişê qanûnanê bingeyînan de pêşnîyarê xo erşawitî bî. Nê esasî ser ganî qanûnî bêrê vetene ke problemî bi rayîrê sîyasetê demokratîkî bêrê çareser kerdene.”
‘Ma vengdayîşê eştişê gaman bikerê’
Veysî Dîlekçî dîyar kerd ke nê prosesî de dewlete tu game nêeşta û wina dewam kerd: “Paweyê sazgeh û rêxistinan, komelê Tirkîya û şarê kurdî no yo ke bilez gamî bêrê eştene ke proses aver şêro. Ma do waştişê şarê xo bîyarê ziwan, çar merkezanê muhîmî de mîtîngê azadîye do bêrê viraştene. Mîyanê nê merkezan ra yew zî Wan o. Mîtîngê Wanî 27ê hezîrane roja şemîye saete 17: 00 de Meydanê Newrozî de yo. Ma do uca bi sazgeh, rêxistin û sîyasetmedaranê xo reyde reyna seba çareserîya demokratîk vengdayîş bikerê ke gamî bêrê eştene.”
Muhîmîya azadîya Abdullah Ocalanî
Dewamê qiseykerdişê xo de Veysî Dîlekçî bale ante serê azadîya fîzîkî ya Rayberê Şarê Kurdî Abdullah Ocalanî û vat: “Ma zanê ke sermuzakerevanê nê prosesî birêz Ocalan o. Ganî şertê birêz Ocalanî bilez bêrê vurnayene û azadîya ey ya fîzîkî bi ca bêro. Birêz Ocalan ganî mîyanê şertanê azad de nê prosesî rayra bero. Heto bîn ra ganî girewteyê sîyasî û yê nêweşî bêrê veradayene. Sewbîna zî îradeyê şarê kurdî ameyo xesp kerdene, ganî no îradeyê şarî zî reyna bêro destvistene. Naye ra no mîtîngê ma zaf muhîm o.”
‘Mîtîng cewabê gama 27ê sibate yo’
Hemserekê DEM Partî yê qezaya Tûşbayê Refîk Çîdal bale ante serê azadîya Rayberê Şarê Kurdî Abdullah Ocalanî û vat: “No mîtîng seba azadîya Rayberê Şarê Kurdî, komel û şarê bindestî muhîm o. Rayberê Şarê Kurdî 27ê sibate de gamêka tarîxî eşte. Mîtîngê ma zî cewabê na game yo. Ma vanê ke şarê dinya yê pêroyî seba xo çi wazenê ma kurdî zî seba xo aye wazenê. Ma wazenê şarê ma tewrê mîtîngê azadî û aştî bibo. Destê xo bidê destê Rayberê Şarê kurdî ke destê ma xurt bibo.”
‘Ma wazenê waştişanê xo mîtîng de rêz bikerê’
Rayberê Dem Partî yê Wanî Ûmît Tayanir zî bale ante serê muhîmîya mîtîngî û da zanayene ke no mîtîng seba azadîya Rayberê Şarê Kurdî, girewteyanê sîyasî û şarê kurdî zaf muhîm o. Umît Tayanir qiseykerdişê xo wina dewam kerd: “No mîtîng ganî bibo cewabê nê prosesî. Nê prosesî de hema game nêameya eştene.. Ma wazenê bi nê mîtîngî, meydanê Newrozî de waştişanê xo bîyarê ziwan û şarê ma zî tewrê nê mîtîngî bibo.”
