Parlamenteranê DEM Partî seba girewteya nêweşe Leyla Cuma Îbrahîmî ya ke heqê aye yê weşîye yeni binpaykerdene, muracatê ÎHÎK’î kerd.
Parlamenterê Partîya Têduştî û Demokrasî ya Şaran (DEM Partî) Berîtan Guneş Altin, Onur Duşunmez, Serhat Eren û Newroz Uysal Aslan derheqê redkerdişê girewtişê xizmetê weşîye yê Leyla Cuma Îbrahîmî ya ke Hepisxaneyê Cinîyan ê Erzîncanî de yena girewtiş, muracatê Komîteya Cipersayîşê Heqanê Merdiman a Parlamentoyî (ÎHÎK) kerd.
Muracatî de yeno vatiş ke Leyla Cuma Îbrahîm nêzdîyê yew aşmî yo ke problemê weşîye yê cidî ciwîyena û nêeşkena biresa xizmetanê weşîye yê laziman. Ame dîyarkerdene ke girewteya nêweşe Leyla Cuma demêko derg o semedê emel û qelibnayîşî baş nîya. Gonî fekê aye ra yena, kîsêk sîneyê aye de ameyo tespîtkerdiş û dejêk milê aye est o. Parlamenteran dîyar kerd ke gerreyê weşîye zaf reyan hetê gardîyananê hepisxaneyî ra vernîya berê hucreyî de bi pêmawitişê tansîyonê gonî yeno erjnayîş û eke wendişê tansîyonê gonî asayî bibo, sewqkerdişê nêweşxaneyî nîno kerdiş.
Waştişê sewqkerdişê lezkî
Muracatê Komîsyonê Heqanê Merdiman rê waştişê cipersayîşêk lezkî yê rewşa weşîye ya Leyla Cuma Îbrahîmî, peydakerdişê tomarê weşîye û nêweşxaneyî, cipersayîşêk sebebê qebulnêkerdişê waştişanê aye yê semedê neqlkerdişê nêweşxaneyî û agahîya newekerdeyî ser o Wezaretê Edaletî û Weşîye kerd. Parlamenteran sewbîna waşt ke girewta bilez semedê nêweşxaneyêk baş bêra neqlkerdiş û muayeneyê lazimî bêrê kerdiş.
