Komela Rojnamegeran a Dîcle Fîratî (DFG), rojnameger Bayram Balciyo ke vizêr Ewropa de rîyê nêweşîya kanserî ra wefat kerd, bi eşkerayîyêka fermî yad kerd û vat: “Vîrameyîş û têkoşînê ey do mîyanê tarîxê rojnamegerîye de her tim biciwîyo.”
Rojnameger û şaîr Bayram Balci (63) ke Ewropa de 7 serrî rîyê nexweşîya kanserî ra ameyêne dermankerdene, şewe nêweşxaneyo ke tede ameyêne dermankerdene, uca de dinyaya xo bedilnaye. Komela Rojnamegerqan a Dîcle Firatî (DFG) eşkerayîyêk reyde Bayram Balci yad kerd, keye, nas û pêro çapemenîya azade rê serweşîye waşt.
Eşkerayîya DFG’yî wina ya: “Rojnameger Bayram Balciyo ke demêko derg û dila rojnameyê Ozgur Gundemî de ked daye, nêweşxaneyo ke tede ameyêne dermankerdene, uca de cuya xo ra bi.
Bayram Balciyo ke qismê tewr zêde yê emrê xo dîyarî têkoşînê çapemenîya azade kerd, bi kede û tecrubeyê xo yê qada rojnamegerîye de rayîr nîşanê xeylê hemmeslekanê xo da. Bayram Balciyo ke şêwirmendîya senaryoyê fîlmê PRESS’î zî kerdêne (fîlmo ke şahîdîyêka pîle tarîxê çapemenîye rê keno), kesanê tewr bierj ê têkoşînê rojnamegerîya azade û heqîqetpawitoxan ra yew bi.”
Kedkaranê verên ê rojnameyê ozgur gundemî ra yew bi
Dewamê eşkerayî de cuya ey ser o wina ame vatene: “Bayram Balci, kedkaranê verên ê rojnameyê Ozgur Gundemî ra yew bi. Serranê 1990î de, demêko winasîn de ke binpaykerdişê giran ê heqanê merdiman qewimîyayêne, seba xeberanê ke viraştêne zaf reyî ame tehdîtkerdene û derbarê ey de dewayî ameyî akerdene.
Bayram Balciyo ke eynî wextî de şaîr zî bî, 34 serrî ra zafêr Çapemenîya Azade de xebitîya. Bayram Balci, demêko derg û dila serwîsa kultur û hunerî ya Medya Haberî de edîtorî kerdêne.
Ma hemmeslekê xo Bayram Balci bi rêz û minet yad kenê; keye, nas û pêroyê çapemenîya azade rê serweşîye wazenê. Vîrameyîş û têkoşînê ey do tarîxê rojnamegerîye de her tim biciwîyo.”
