Şubeyê ÎHDyî û Merdimê Vindîbîyayeyan zaf merkezan de bi waştişê “Vindîbîyayeyî bêrê vînayene û failî bêrê muhakeme kerdene” eşkerayîye daye.
Endamê Komîsyonê Vindîbîyayeyan ê Amedî Firat Akdenîzî bale ante serê têkoşînê pawitişê heqan û vat: “Ma zanê ke heta ke aştî nêbo vindîbîyayeyî zî nînê vînayene.” Şaxê ÎHDyê Amedî, Êlih û Riha çalakîya xo yê hewteneyî de bi waştişê “Vinîbiyayeyî bêrê vînayene û failî bêrê muhakeme kerdene” domna. Zafê îdarekar û hemserekê partîyanê siyasîyan, temsîlkarê sazgehanê sivîl ê demokratîkan û pawitoxê heqanê merdiman tewrê çalakî bîyî.
Amed
Merdimê vindîbîyayeyan çalakîya xo yê 906. de aqûbetê Salîh Çalik û Sînan Fîdanî ke 6ê hezîrana 1994î de ameybî destbendkerdene û vindîkerdene, persayê. Xeylê endam û rayberê partîyanê siyasîyan, temsîlkarê sazgehanê sivîlan û pawitoxê heqanê merdiman tewrê eşkerayîye bîyî. Endamê Komîsyonê Vindîbiyayan ê Şaxê ÎHDyê Amedî Firat Akdenîzî eşkerayîye de bale ante serê muhîmîya domnayîşê çalakîyanê ke semedê aqûbetê vinîbiyayeyan yenê viraştene û vat: “Ma tena semedê persayîşê aqûbetê vinîbiyayeyan ney, eynî wext de semedê vengdayîşê bi ca ardişê edaletî yenê têhet. Ma zanê ke heta ke aştî nêbo vinîbiyayeyî zî nînê vînayene. Na çarçewa de prosesê ke yeno rayraberdene zaf muhîm o.” Endama Heyetê Rayberî ya ÎHDyî Parêzer Berfîn Elçî hîkayeya Salîh Çalik û Sînan Fîdanî wende. Eşkerayîye badê çalakîya roniştişî qediya.
Êlih
Merdimê Vindîbîyayan û îdarekarê Şaxê Komela Heqanê Merdiman (ÎHD) ê Êlihî hewteyê 742. de çalakîya “Wa vindîbiyayeyî bêrê vînayene û qatilî bêrê muhakeme kerdene” de verê Abîdeyê Heqanê Merdiman ê Cadeyê Gulistanî de ameyî têhet û aqûbetê Mehmet Siddikî ke 21ê hezîrana 1993î de dewa Qerqatî ya qezaya Çinarê ya Amedî de amebî destbendkerdene û vindîkerdene, persayê. Çalakî de de rayber û endamê ÎHDyî û Merdimê Vinîbiyayeyan û xeylê kesî amade bîyî û fotografê kesê ke ameyê destbendlkerdene, kiştene û vinîkerdene berz kerdî. Metnê eşkerayîye hetê rayberê ÎHDyê Êlihî Zana Yucel Bozkûrtî ra ame wendene. Eşkerayîye bi deqîqeyêk çalakîya roniştişî qediya.
Riha
Şubeyê Komela Heqanê Merdiman (ÎHD) ê Riha û merdimê vindîbiyayeyan hewteyê 77. de çalakîya xo yê bi waştişê “Wa vindîbîyayeyî bêrê vînayene, failî bêrê muhakeme kerdene” domna. Merdimê vindîbiyayan û pawitoxê heqanê merdiman Parka Novada ya qezaya Xelîliye ya Riha de kom bîyî. Çalakî de pankartê ke fotografê vinîbiyayeyan ra ameya viraştene û fotografê vindîbîyayan ameyî berzkerdene. ÎHDyî fealiyetê xo yê nê hewteyî de aqûbetê Mehmet Salîh Tatliyî ke wisarê serra 1992î de, merkezê Riha de, verê Merkezê Karî yê Cebecî de netîceya yew hêrişê çekdarî de cuya xo ra bî, persayêEndamê sazgehanê sivîlan û xeylê merdimê vindîbiyayan tewrê çalakî bîyî. Endamê ÎHDyî yê Riha Muslum Kina hîkayeya Mehmet Salîh Tatliyî wende.
Eşkerayîye dima deqîqeyêk çalakîya roniştişî qedîya.
