Hêrişanê hewayî yê artêşa Îsraîlî de ke Başûrê Lubnanî ser o ameyî kerdene, tewr kêm 25 kesî cuya xo ra bîyê. Zafêrî qurbanîyan eyn keye ra bîyî û gede bîyî.
Artêşa Îsraîlî hewa ra hêrişê başûrê Lubnanî kerd. Tewr kêm 25 kesî merdî, zaf kesî zî birîndar bîyî. Goreyê çimeyanê herêmî, hêriş pêroyê şewe ra heta destê sibayî xeylê herêman de ameyî vîraştene.
Şaristanokê Harûfî de, encamê bombardumanê serê keyeyêkî de, eyn keye ra 6 kesî merdî. Ame dîyarkerdiş ke qurbanî dayîk, pî û çar domanê înan bîyî. Ekîbanê xelaskerdişî dîyar kerd ke binê enqazî ra vengê hetkarîye yê gedeyan ameyo eşnawitene.
Dewa Şarkiyyeye de çar kesî ameyî kiştene. Kfarsir de dayîkêk û kênaya xo cuya xo ra bîyê, di kesî zî birîndar bîyî. Cibşit de zî mêrde û cinîya xo hêrişan de cuya xo ra bîyê.
Duweyr de hêrişê serê motorsîkletekî de kesêk merd, yew zî birîndar bî. Eyn herême de hêrişê dîyine yê ver awanîya perwerdeyî de merde û birîndarî est ê. Deyr ez-Zahranî de zî hêrişê bi teyareyanê bêmerdim de kesêk merd, kesêk zî birîndar bi.
Hîzbullah: Îsraîl ser nêkewt, do nêreso amancanê xo
Hetê bînî ra, Serekê Grûba Hîzbullahî yê mîyanê parlamentoyî Mohammad Raadî dîyar kerd ke şerê Îsraîlî yê vera Hîzbullahî ser nêkewto.
Mohammad Raadî vat: “Şerê dişmenî yê seba çinkerdişê xoverdayîşê Lubnanî yeno kerdene, ser nêkewto û do nêreso amancê xo.”
Mohammad Raadî sewbîna îfade kerd ke tifaqê mabênê DYA û Îranî ganî pê baldarîye bêro hesabkerdene û îdia kerd ke mutabaqat vernîya hêzanê Îsraîlî de teqwîmêk roneno ke xo başûrê Lubnanî ra apey biancê.”
Rayedarê Hîzbullahî veng da hukmatê Lubnanî ke çarçewaya muzakereyanê nereyêk ê Îsraîlî reyde dîyar bikero. Na eşkerayî, verê kombîyayîşanê newe yê mabênê Lubnan û Îsraîlî de ameya dayene ke do hewteyêk ra pey Washîngton de bêrê viraştene.
