TJA, DEM Partî û DBP’yî derheqê “Mîtîngê Azadî” de dîyar kerd ke no mîtîng seba azadîya fîzîkî ya Rêberê Şarê Kurdî Abdullah Ocalanî zaf muhîm o û vengdayîşê şarî kerd ke tewrê mîtîngî bibê.
Têgêrayîşê Cinîyanê Azadan (TJA), Partîya Herêmanê Demokratîkan (DBP), Partîya Têduştî û Demokrasî ya Şaran (DEM Partî), seba azadîya fîzîkî ya Rayberê Şarê Kurdî Abdullah Ocalanî 27ê hezîrane de Wan û Mêrsîn de, 28ê hezîrane de zî Amed û Stenbol de bi sloganê “Bi Rayberîya Azade ver bi Azadîye Şonê”, “Mîtîngê Azadîye” virazenê.
Amed de 28ê hezîrane de Meydanê Îstasyone de saete 17.00 de virazîyeno. Hemsereka Pêroyî ya DBP’yî Çîgdem Kiliçgun Uçar û Veysî Aktaş sey qiseykerdox tewrê mîtîngî benê. Hunermendî Serhado, Kadîr Çat û Pinar Aydinlar mîtînge de konser danê. Xebatê mîtînge verê her çî Amed û Botan de û zaf şaristananê vakurê Kurdîstanî de yenê rayraberdene.
Rayberê DEM Partî yê Amedî Celal Alphan, Verfekê DBP’yî yê Amedî Metîn Oner û aktîvîsta TJA’yî Emîne Caynak şarî rê vengdayîş kerd ke tewrê mîtîngî bibê.
“Ma şarê xo ra, 7 serrî ra heta 70 serrî veng danê ke bêrê tewrê mîtîngî bibê.”
Celal Alphanî vengdayîşê Rayberê Şarê Kurdî Abdullah Ocalanî ya ke 27ê sibata 2025î de kerdbî ser o vindert û wina vat: “No mîtîng seba şarê ma, seba her kesî zaf muhîm o. Ma do seba azadîya fîzîkî ya Rayber Apo nê mîtîngî bivirazê. Ma şarê xo rê vengdayîş kenê; cinî, domanî, 7 serrî ra heta 70 serrî ma vengdayîşê şarê xo kenê ke bêrê tewrê nê mîtîngî bibê. A roje wa her kes bêro Meydanê Îstasyone, wa sey laserî bêrê û wa wayîrê birêz Ocalanî vejîyê. Wayîrvejîyayîşê birêz Ocalanî, wayîrvejîyayîşê erjê şarê kurdî yo.”
‘Seba azadiya fîzîkî ya Rayberê şarê Kurdî wa vengê ma bibo yew’
Metîn Onerî zî diyar kerd ke seba prosesê aştî dewlete gamê şênberî nêeştê û wina dewam kerd: “Prosesê ‘Aştî û Komelê Demokratîk’ de xetimîyayîşêk esto. Seba azadîya Rayber Apo, 28ê hezîrane de Meydanê Îstasyone de mîtîngê ma est o. Ma şarê xo yê Amedî, kedkaran, cinîyan, ciwanan û pêro şarê xo dawetê mîtîngî kenê. Wa pêro şarê ma a roje uca de bo, seba Rayberê Şarê Kurdî, azadîya ey ya fîzîkî, vengê xo bîyarê pêser û biqîrê. Ganî şar seba azadîye wayîrê nê prosesî vejîyo. Ganî şarê ma, pêro şarê Amedî, pêro şarê Kurdî wayîrê nê prosesî vejîyo, pêro şarê bînî, şarê ke Tirkîya de ciwîyenê, eke wazenê Tirkîya de demokrasî ronîyo ganî wayîrê prosesî vejîyê, seba ke no proses bireso netîce, bêrê ma pîya, seba azadiya fîzîkî ya Rêber Apo bêrê têhet.”
‘Azadî seba Serekê ma, azadî seba şarê ma’
Emîne Caynak zî qiseykerdişê xo de da zanayene ke xebatê mîtîngî dayê destpêkerdene û wina vat: “No mîtîng seba azadîya Serekî, statuyê Serekî û meselaya Kurdî zaf muhîm o. Ma tîya ra wazenê şarê xo rê vengdayîş bikerê; hem herêma Amedî, herêma Mêrdîn, Êlih, Riha û hem zî şaristanê ma yê bînî wa tewrê mîtîngî bibê. Taybetî zî cinîyan rê, 7 serrî ra heta 70 serre, waştişê ma o yo ke nê mîtîngî de ca bigîrê. Amancê mîtîngî, taybetî azadîya fîzîkî ya Serekî ya. Hetê bînî ra zî embazê ma yê ke nika hepisxaneyan de yê, embazê ma yê nêweşî, yê ke surgun de yê yan zî bi qanûnê terorî yenê sucdarkerdene, wa nê qanûnî bêrê vurnayene; şarê ma nê waştişî de yo. Her tim waştişê ma aştîyêka birûmet a. Çike têkoşîno ke yeno rayraberdene, têkoşînêko birûmet o; seba estibîyayîşê şarêke, seba estibîyayîşê têkoşînê cinîyan serkewo. Vengdayîşê ma yê seba nê mîtîngî; seba azadîya Serekî, ma şarê xo dawetê meydanê Îstasyone kenê. Azadî seba Serekê ma, azadî seba şarê ma.”
