Yadkerdişê Amedî de Çigdem Kiliçgun Uçare vat, “Ma do şorişgêranê Kurdîstanî hend bipawê, tim vîrê ma de bimanê.” Çetin Arkaşî zî vat, “Eke ewro Îrali de masaya haştîye ameye ronayene, no xeyrê nê ciwanan o. Şima pê înan çend serebez bî zî kêm o.”
Parka Koşuyolu ya Rezanê Amedî de serkêşîya MEBYA-DERî de seba Şehîdanê Azadîye yê Kurdîstanî programê yadkerdişî ame organîzekerdene. Pîya bi keyeyanê şehîdan, temsîlkarê partîyanê sîyasîyan û dezgehanê komelê sîvîlî û Amed û bajaranê dormeyî ra bi hezaran kesî tewrê ci bîyî.
Yadkerdiş de sloganê sey “Bijî Serok Apo”, “Şehîd namirin”, “Bê Serok jiyan nabe”, “Riya şehîd riya me, Apo’ye Serokê me” û “Riya şehîd riya me, PKK partîya me” ameyî vatene. Warê yadkerdişî de postero gird ê Rayberê Şarê Kurdî Abdulah Ocalanî ame akerdene. Yadkerdiş bi rêzgirwtişî dest pê kerd, marşê “Çarxa Şoreşê” ame wendene û sloganê “Şehîd namirin” û “Bijî Serok Apo” ameyî vatene. Dima ra nameyê şehîdan ameyî wendene.
Hemsereka Pêroyî ya DBPyî Partî Çîgdem Kiliçgun Uçare ard ziwan ke ê do wayîrê têkoşînê şehîdan bivejê û şarê kurdî dewrê neweyî de têkoşînê azadîye û demokrasî bidomno.
Çetin Arkaşî zî îfade kerd ke kurdan metodê têkoşînî bedilnayî la waştişê azadîye û rumetî canêverdayî û vat nê prosesî de haştîye û pîyaciwîyayîş vejîyenê vernî. Arkaşî veng da ke wa keyeyê şehîdan ra bêro wayîrvejîyayene û dezgehî înan teyna meverdê û vat, “Eke ewro Îmrali de masaya haştîye ameya ronayene, no xeyrê nê ciwanan o. Şima pê înan çend sereberz bî zî kêm o.”
Yadkerdiş badê mojnayîşê fotografanê gerîlayan û sînevîzyonî, bi çepik, tîlîlî û sloganan qedîya.
