Kongreya Demokratîke ya Şaran (HDK) do 8-9ê sibate de Îstanbulî de bi sloganê “Rayîrê Ciwîyayîşê Azad û Seypêyî yê Şaran de, Çareserî Aştî ya” konferansêka mîyanneteweyî virazo. Konferansî de do tecrubeyê çareserîya têkoşînî yê Afrîkaya Başûr, Kolombîya û Îrlanda Vakurî bêrê munaqeşekerdene.
Konferans ke do şeş roniştişan ra pê bêro, sîyasetmedar, roşnvîr, tarîxnas û huqûqnasê neteweyî û mîyanneteweyî do beşdar bibê. Roniştişanê konferansî de do babetê sey “Meseleyê kurdî: Seserra 1. ra Seserra 2. Têkoşînê Heqîqetî”, “Çareserîya Demokratîke ya Meseleyê Kurdî û Perspektîfê Aştî”, “Rayîrê Aştî de: Çareserî, Tecrubeyî û Modelî” û “Ma do Tirkîya de Zemînê Komelkî yê Aştî Senî Awan Bikê?” bêrê munaqeşekerdene.
Konferans de do tecrîd û problemê ey, rolê Rayberê PKK’yî Abdullah Ocalanî yê tecrubeyê Oslo û Îmralî, tecrubeyê çareserîya têkoşînanê mîyanneteweyî û rêxistinbîyayîşê komelkî û îdarekerdişê sîyasî yê Rojawanê Kurdîstanî ser o zî munaqeşeyî bêrê kerdene. Konferans de hem krîzê globalî hem zî halê ewroyên yê Rojhelatê Mîyanênî de gêrayîşê aştî do bêro qalîkerdiş.
