DBP bi sloganê “Ma vatişê aştî şarî reyde awan kenî” dest bi xebatanê “Mîtîngê Azadîye” keno ke do 27 û 28ê hezîrane de Wan û Amed de bêro viraştiş.
Bi serektîya Platformê Sazgehanê Demokratîkan, do 27ê hezîrane de Wan û Mêrsîn de; 28ê hezîrane de zî Amed û Stenbol de seba azadîya fîzîkî ya Rayberê Şarê Kurdî Abdullah Ocalanî bi sloganê “Ma vatişê aştî şarî reyde awan kenî” “Mîtîngê Azadîye” bêro organîzekerdene. Partî, sazgeh û komeleyê ke Vakurê Kurdîstan û Tirkîya de yê, seba mîtîngî kewtî mîyanê xebatêka pîl ke bi nê mîtîngan vengê azadîye berz bikerê. Partîya Herêmanê Demokratîkan (DBP) derheqê xebatanê xo yê mîtîngî de eşkerayîyêka nuştekî pare kerd.
‘Ma do rexne û pêşnîyazanê şarî goşdarî bikerî’
DBPyî dîyar kerd ke ê seba ke rasterast şarî reyde pêvînayîşan bikerê, problemanê komelî ca de goşdarî bikerê, bierjnê û binyadê aştîya komelkî bi hawayêko xurt awan bikerê, do 16ê hezîrane de xebata xo ya mîtîngî bidê destpêkerdene û wina vat: “Na xebata ke do nêzdîyê aşmêk dewam bikera, do xeylê şaristan, qeza, dewe û taxan de bêre kerdene. Mîyanê na xebata hempare de parlamenterê ma, endamê meclîsê partîya ma, endamê rêxistinanê qeza û şaristanan ê partîya ma û kadroyanê partîye yê şaristan û herêmanê xo do bikewê mîyanê têgêrayîşî. Taybetî û rêbazê na xebate o yo ke; pêvînayîşî zereyê sazgehan de nê, do cayanê ciwîyayîşî yê şarî de bêrê kerdene. Taxan de, dewan de, cayanê viraştîş û bazaran de, cayanê gure û kede de, bi kilmî pêro cayanê cuye de ma do problemanê şarî, rexne û pêşnîyazanê înan goşdarî bikerî û înan reyde bierjnê.
Amancê bingeyîn ê na xebate, pîya fêmkerdişê problemanê komelî û xurtkerdişê têkilîya sîyasetê komelkî yo. Sewbîna, bi na xebate yewna amancê ma zî o yo ke; awankerdişê û pêvînayîşê aştî û komelê demokratîkî de îradeyê şarî bivejî orte û bi na rewşe binyadê pêameyîşê komelî xurt bikerî. Mîyanê na çarçewa de, nzêdîbîyayîşê kedkar û sazgehanê çapemenîye yê seba na xebate zaf bimana û muhîm o. Taqîbkerdiş û resnayîşê pêro programanê na plansazî zaf biqîmet û erjîyaye yo.
Nê semedî ra, ma rojnameger û kedkaranê çapemenîye dawetê xebata xo ya “Ma vatişê aştî şarî reyde awan kenî” kenî ke do 16ê hezîrane de dest pêbikero.”
DBPyî dîyar kerd ke mîyanê xebatan de do nê sernameyan ser o vinderî:
- Ewnîyayîşê şarî yê derheqê Prosesê Aştî û Komelê Demokratîkî de,
- Problemê ke warê citkarî, heywandarîye û aborî de qewimîyenê,
- Problemê sey bêkarî, çeteyî û madeyanê hişberan ê ke ciwanî înan reyde rrî bi rî yenê verdayîş,
- Tehdîtî ke vera xoza û cayanê ekolojîkî yenê kerdene,
- Problemê herêmî û komelkî û kaosî ke mîyanê komelî de qewimîyenî,
- Problemê ke şarê xeta sînorî ser o ciwîyenê, vînenê,
- Xorêxistinkerdiş û tewrbîyayîşê komelî.
Goreyê plansazîya ke DBPyî kerda, aşma hezîrane de xebatê hemserek, endam û rayberanê înan wina yê:
- Hemsereka ma ya Pêroyî Çîgdem Kiliçgun Uçar do 16-17-18ê hezîrane de Şirnex de, 19-20ê hezîrane de Sêrt de, 21-22-23yê hezîrane de Mardîn de, 24-25-26ê hezîrane de Êlih de û 28ê hezîrane de zî Mîtîngê Pîl ê Amedî de biba.
- Hemserekê ma yê Pêroyî Keskîn Bayindir zî do 19-20-21ê hezîrane de Colemêrg de, 22-23-24ê hezîrane de Wan de û 27ê hezîrane de zî Mîtîngê Pîl ê Wanî de bibo.
