Wekîla DEM Partî ya Sêrtî Sabahat Erdogan Saritaş vat: “Êyê ke îrade, nasname û kulturê kurdan nêşinasnenê bin kewtî. Çew nêeşkeno îradeyê şarê kurdî teslîm bigêro.”
Wekîla DEM Partî ya Sêrtî Sabahat Erdogan Saritaş derheqê destsernayîşê Şaredarîya Sêrtî de Ajansê ANF’yî rê qisey kerd.
Sebahat ard vîrê ke Hemşaredare Sofya Alagaş bi maneya xebatê rojnamegerîye karî ra ameya girewtene û herinda hemşaredaran de qeyûm ameyo tayînkerdene. Sebahate vat: “Serê sibayî nişka ra qeyûm ame tayînkerdene. Ê vanê qey eke tarîye de çîyêkî bikerê do çew nêeşnawo. Ma do nêverdê ke ancî îradeyê ma çin bihesibîyo. Ma do heta peynî têkoşînê xo bidomnê.”
Saritaş dîyar kerd ke na reya hîrêyîn a ke Sêrtî rê qeyûm yeno tayînkerdene û wina dewam kerd: “Êyê ke îrade, nasname û kulturê kurdan nêşinasnenê bin kewtî. Çew nêeşkeno îradeyê şarê kurdî teslîm bigêro. Kurdî do têkoşînê xo de gamêka apey nêerzê.”
Sebahat venga komelê Tirkîya da ke verba zîhnîyetê qeyûman a nehuqûqî hetê kurdan de cabigêro. Sebahate vat: “Qeyûmî seba dizdî û talanîye ameyê Kurdîstanî. Ma venga her kesî danê ke seba haştîye ma de mil bi mil têkoşîn bikerê.”
