Komîsyonê Hepisxaneyan ê Şubeyê Komeleya Heqanê Merdiman (ÎHD) yê Anqara, derheqê girewteya sîyasî Seda Baykane ke grevê vêşanîye de ya eşkerayîye da û dîyar kerd ke heqê ciwîyayîşî yê Seda Baykane yeno binpaykerdene û seba grevê vêşanîye weşîya aye baş nîya.
Komîsyonê Hepisxaneyan ê Şubeyê Komeleya Heqanê Merdiman (ÎHD) yê Anqara, derheqê girewteya sîyasî Seda Baykane ke Hepisxaneyê Amedî de yena girewtene û 1ê nîsane ra nata grevê vêşanîye de ya, merkezê şubeyê xo yê qezaya Çankaya ya Anqara de eşkerayî da. Endam û temsîlkarê dezgeyanê sivîlî û pawitoxê heqanê merdiman tewrê eşkerayîye bîyî. Eşkerayî hetê endama Heyetê Rayberdişî ya Şubeyê ÎHDyî yê Anqara Bariş Barişik ra ameye wendene.
Bariş Barişik va ke ganî caardişê tecrîdî bêrê qedênayene û wina vat: “Seda Baykana ke Hepisxaneyê Girewte yê Amedî de yena girewtene, 1ê nîsana 2026î ra nata seba binpaykerdişê heqanê merdiman û waştişê mendişê yew hepisxaneyê ke nêzdîyê keyeyê aye bo, dest bi grevê vêşanîye kerdo. Seda Baykane 4 serrî yo yew oda de tena manena û binê tecrîdî de ya. Hetê komeleya ma ra seba çareserîya nê karî, muracatê Serdozgerîya Komare ya Amedî ameyo kerdene. La qet yew netîce nêameyo girewtene. Avûkatê ma Hepisxaneyê Girewte yê Cinîyan ê Amedî de Seda Baykane reyde pêvînayîş kerd. Goreyê vatenê aye ra serê grevê vêşanîye ra nata 12 kîlo zeyîf bîya. Waştişê aye yê sewqkerdişî yeno astengkerdene. Caardişê sey tecrîdî psîkolojîya girewteyan ser o netîceyê xirabî vejenê werte.
‘Heqê ciwîyayîşî yeno binpaykerdene’
Bariş Barişik dîyar kerd ke heqê bingeyînî yê girewteyan yenê binpaykerdene û wina qisey kerd: “Tirkîya hetê Peymana Heqanê Merdiman a Ewropa ya, la caardişê ke hepisxaneyan de benê, vera madeyanê 2 û 3yan ê. Hepisxaneyan de heqê ciwîyayîşî yê merdiman yenê binpaykerdene. Başkerdişê şert û mercanê mehkûman berpirsîyarîya dewlete de yo. Hepisxaneyan de seba çareserkerdişê binpaykerdişanê heqanê merdiman, çareyê peyên grevê vêşanîye yo. Grevê vêşanîye yê Seda Baykane weşîya aye her ke şina hîna giran keno. Seba ke weşîya aye bi şiklo baş bêro şopnayene, ganî binê kontrolê doktoran de bo. Ma berpirsîyaran ra waştiş kenê ke wa caardişê tecrîdî biqedênê û waştişê Seda Baykane bîyarê ca. Ma do na babete teqîp bikerê.”
