Hemsereka DBP’yî ya Pêroyî Çîgdem Kiliçgun Uçar ke Sêrt de qisey kerd, dîyar kerd ke çareserîya meseleyê kurdî de gamanê tewr muhîman ra yew azadîya Rayberê PKK’yî Abdullah Ocalanî ya.
“Têhetameyîşê Azadîya Komelkî û Aştî” DBP û DEM Partî dewam kenê. DEM Partî Rêxistina Sêrtî de bi beşdarîya Hemsereka DBP ya Pêroyî Çîgdem Kiliçgun Uçar têhetameyîş virazîya. Zaf kesî beşdarê têhetameyîşî bîyê. Hemserekê DEM Partî yê Sêrtî Eşref Tekînî bale ant muzakereyanê meseleyê kurdî ser o û seba beşdarbîyayîşê mîtîngê ke 8ê sibate de do Amed de bêro viraştene vengda.
Gama tewr muhîme Azadîya Ocalanî ya
Hemsereka Pêroyî ya DBPyî Çîgdem Kiliçgun Uçar, bi reaksîyonê tayînkerdişê qeyyûmî yê Şaredarîya Sêrtî dest bi qiseykerdişê xo kerd. Aye bale ant muzakereyanê çareserîya meseleyê kurdî û vat ke kurdî seserrî yo sey şaranê bînan seypê nêciwîyenê. Uçar vat: “Ma resayê çareserîya demokratîke ya meseleyê kurdî ke se serrî yo îqtidarî qebul nêkeno. Proseso ke bi destdayîşê Dewlet Bahçelî dest pêkerd, şîyayîşê Îmralî reyde bîyo prosesêko newe.”
Uçar îfade kerd ke Rayberê PKK’yî Abdullah Ocalan hema hepisxane de yo û va: “Seba ke dewro newe bibo proses, gamanê tewr muhîman ra yew azadîya Rêzdar Ocalanî ya ke Îmralî ra vejîyo û seba çareserîya na mesele partîya xo, rêxistinê xo û şarê xo reyde nê prosesî ser o qisey bikero.”
Uçar peynî de wina vat: “Ma qalê munaqeşeyêk kenê ke tu kes, tu îqtidar nêeşkeno ey bihermîno. Ma seba ke dewrê neweyî de berpirsîyarîye bigîrê ameyî têhet.”
Têhetameyîş dima bê çapemenî dewam kerd.
