Cinîyanê Sûrîyeyîjan dîyar kerd ke hêvîya înan awankerdişê Sûrîyeyêka pluralîste ya ke tede azadîye, heq û azadîya cinîyan yenê pawitene. Cinîyan vat ke ê do ney ra kêmêr çîyêk qebul nêkerê.
Sana dîyar kerd ke a sey cinîyê Sûrîyeyîjî, Sûrîyeyêka pluralist wazenê ke heq û azadîya heme mezheb, netewe û dînan pawena. Sana da zanayene ke caardişê nê hêvîyan girêdayeyê asta zîhnîyetê sîyasî ya komelî û weçinitişê prensîbanê seyyewbinî û hûqûqî yo.
Narîman Şaban bi Sana re muhîmîya tewrbîyayîşê cinîyan nuştişê destûrî ser o de hemfikir a û dîyar kerd ke yewbîyayîş û yewbîngirewtişê cinîyan do welatî awan bikero û ver bi aştîye bero.
Narîman dîyar kerd ke: “Ganî ma berpirsîyarîyanê xo bîyarê ca û dima heqanê xo biwazê.” Narîman wina dewam kerd: “Ganî ma qala xo bikê yew û vengê xo hemverê hewldayîşanê peygoşkerdişê estbîyayîşê ma û şenikkerdişê rolê ma berz bikerê. Cinî wayîrê têkoşînêkî yo û beşêko bingeyîn yê komelê Sûrîye yê. Nê semedî ra nêbeno ke heme çî ra bêrê dûrfinayene û şenik vînayene.”
Mamosteya ziwanê Erebî Henîfe Ecac zî vat ke her keso ke nameyê Sûrîyeyîjan ser o qisey bikero ganî temsîlîyetê “lazimî û waştişanê ma bikero” û heme çîyo ke hemverê nê waştişanê ma bo çiray nêeşkeno ma temsîl bikero.”
Derheqê çîyanê ke ganî destûrê neweyî de bibê de Henîfe vat: “Ganî dûrî merkezîyetî û tundîye bo, qeyd û bendê azadîya cinîyan ser o nêrê ronayene. Û bi hewayêk înan keye de nêvindarno, ganî seypêyîya cinsan biba û cinî merkezanê qerardayîşî ra nêrê dûrvistiş.”
Îman Keyalî xebatkara rojnameya “Buqeet Dewû” zî vat: “Ganî cinî heqanê xo ra fek veranêdê û seba agêrayîşê rolê xo yê ke înan ra ameyo diznayene bixebitîyê. Ganî heqanê xo bi destanê xo bîyarê ca û biwazê. Coka ganî seba girewtişê heqanê xo têkoşîn bikerê.
Çalakwane û mamostaya unîversîteya Helebî Nataşa Esferî qala çarenûştişê nêzelale cinîyan nê vurîyayîşan de kerd û derheqê meselî de vat: “Ma hema zî seba girewtişê temsîlîyeta sîyasî ya cinîyan û aktîfkerdişê kotaya cinîyan a karî de têkoşîn kenê. Seba vîyartişê zehmetîyanê vernîya ma hewcedarîya ma bi xebatêka qewetine est a, ganî zaf têdîyayîş û kargehê cinîyan bêrê viraştene.”
