Komîteya Ekolojî ya KCKyî bale ant talankerdişê xoza ser o û wina vat: “Her waro ke daristanê ma tede yeno birrnayene, her warê ke hêga û awa ma tede yenê xespkerdene, her cayê ke awbend, santralê enerjî û madenî tede yenê awankerdene, ganî bibê warê têkoşînî ke heqê cuye bêro pawitene.”
Komîteya Ekolojî ya KCK’yî vat: “5ê hezîrane 1972î de, hetê Neteweyanê Yewbîyayeyan ra konferansê cugehî yo mîyanneteweyî yo yewin ame caardene û na roje sey roja cugehî ya dinya ameye îlankerdene. La mîyanê 54 serranê vîyarteyan de rijnayîşê cugeh û ekolojîk dewam kerd. Emser ma Roja Cugehî ya Dinya ya 5ê hezîrane, demêk de pêşwazî kenê ke rijnayîşê ekolojîkî yê tarîxî tewr şîdetin ciwîyeno. Peymana îklîmî ya mîyanneteweyî yena binpaykerdene. Germbîyayîşê globalî, felaketê ekolojîkî, verdayîşê karbonî, çekdarbîyayîş, eşteyê endustrîyelî, tekelkerdişê citekarî û awe, madenkarî û projeyê enerjî û awbendan, bi problem û dejanê neweyan ke benê sebeb, cayê xo rojdemê dinya de pawenê. Modernîteya kapîtalîste ke xo bingeyê talan, xesp û komelê xerckerdişî ser o awan kena, xoza arde gama peyêne. Tewr muhîm, gama ke şerê enerjî û elementan Rojhelatê Mîyanênî serûbin keno, heta tehdîdê çekê nukleerî zî kewtê rojdem. Heme datayî mojnenê ke eke nê kêmanîyê ke sînor nas nêkenêî înan ra nêvajîyo ‘bes’, do na dinya biwerê biqedênê.”
Eşkerayîya KCK’yî de nê îfadeyan ca girewt: “Demo ke dewlete û têgêrayîşê cugehperwerî yê girêdayeyê dewletan na roje kenê sey roja sembolîke ya pawitişê cugehî, ganî têgêrayîşê ekolojîkî yê vera-dewlet û îqtîdarî na roje bikerê roja têkoşînî vera sîstemê kapîtalîstî û polîtîkayanê neteweyanê-dewletgiran. Êdî vatişê rijnayîşanê ekolojîkî qîm nêkeno. Herinda netîceyan de, ganî merdim bi sebeban û êyê ke sebeban afirnenê, eleqedar bibo. Eke vera zîhnîyet û sîstemê kapîtalîstî têkoşîn nêbo, problemê ekolojîkî do dewam bikerê. Sewîyeya ke krîzê ekolojîkî resayî, mojneno ke têkoşîno ekolojîk tercîh ney, mecbûrîyet o. Ya ma do vera hêzanê ke xoza û cuye dizdenê, pîya têkoşîn bikerê ya zî ma do xoza reyde ke ma her warî de deyndarê ci yê, pîya vîndî bibê.
Mîyanê 50 serranê peyênan de, bi sebebê şer, welatê Kurdîstanî sere ra heta peynî bî warê eko-qirkerdişî. Efrînî ra heta Behdînanî, Botanî ra heta Serhed û Rojhelatî, qetlîamê ekolojîkî ke heme cografyaya Kurdîstanî de vila bîyî, bi stratejîyêka şer, sey dewamê îmhaya fîzîkî û kulturî ke vera şarê kurdî ferz bî, ameyî tatbîqkerdene. Dewê Kurdîstanî yê ke verê bi veşnayîş ameybî vengkerdene, mîyanê awa awbendan de ameyî binkerdene. Bi daristananê veşnayeyan, desan awbendan, bi hezaran ocaxê madenan û polîtîkayanê eko-qirkerdişî, îmkanê cuye ameyî hewanayene û feqîrî, koçberî û bêmerdimkerdiş ame ferzkerdene. Prosesê Aştî û Komelê Demokratîkî yo ke Rêber Apoyî da destpêkerdene, prosesê awankerdişê neteweyê demokratîk o. Ganî merdim vera dorveyanê ke wazenê nê prosesî bikerê firsend û rant û tukerdişî xorîn bikerê, vindero. Goştarîdayîşê na hawara xoza û têkoşînkerdiş, wezîfeya ma ya tewr girde ya wijdan û merdimîye ya. Ganî vera awbendanê ke awe, erd û ameyoxê ma dizdenê û şirketanê madenan ke wazenê zozan û koyanê ma xesp bikerê û êyê ke daristanan birrnenê û veşnenê, her ca de vera înan de ganî bêro vinetene û alternatîfî bêrê awankerdene.”
