Koyê Axdadî û koyê Xarşîye hetêk ra destê xo zimistanî ra nêkerdo û bi heybetê xo yê verênî vewra sipî danê we. Heto bîn ra zî wisarî reng bi rengî dest pêkerdo. Kîşta vewre de, hetê xuşa xuşa awan de, mîyanê kemeran de, her ca de galûrî sûr kenê.
Endî zaf cayan de wisarî emrê xo kerd temam û cayê xo dano hamnanî. Labelê tayê koyanê Dêrsimî de wisarî teze dest pêkerdo. Koyê Axdadî û koyê Xarşîye zî nînan ra yew ê. Hetêk ra vewra sipî serê sîneyê koyan de vinderte ya, hetêk ra zî pêro vaş û vilikan sereyê xo veto serê dinya.
Nê rindekîyan ra yewe zî Vilika Galûre ya ke her cayê nê koyan bi rengê xo yê kesk, sûr û zerî xemelnena. Tayê herêman de cira Vilika Vajî û Vilika Sermonîka zî yeno vatene.
Zimistan û wisarê emserî de vewre û varan zaf varayî. Nê semedî ra wisarê emserî zî her cayê welatî bi rindekîya xo kerdo delal. Koyê dewa Xarşîye û Koyê Axdadî de vilikanê galûran û vilikanê bînan der û dormeyî bi rindekîya xo xemelnayo.
Her ca de gima gima awan a, her ca bîyo şên. Vilikê Galûran hetêk ra bi şekil û şoretê xo yo ke vajî yo, hetêk ra zî her ca de kewe nêbîyayîşê xo ser, heto bîn ra zî seba ke emrê xo kilm o, nebatêko endemîk û biqîmet o. Aye ra wekerdene û berdena xo qedexe ya.
