Muxabira Ajansê Mezopotamya Sema Bîngol û 7 kesê bînî ke vizêr ameybî destbendkerdene dimayê kontrolê nêweşxaneyî ameyî veradayene. Karûbarê îfadeyî yê 16 kesanê bînan edlîye de dewam keno.
Partîyê sîyasî û rêxistinê sivîlî yê Anqara seba yadkerdişê Ethem Sarisulukî ke serra 2013î de rîyê çalakîyanê Parka Gezî ra hetê polîsan ra amebî qetîlkerdene, waşt programêkê yadkerdişî virazê. Polîsan dormeyê girseyî girewt û hêrîşê ci kerdbi. Muxabira Ajansê Mezopotamya Sema Bîngol zî tede, pêro pîya 24 kesî ameybî destbendkerdene.
Muxabira Ajansê Mezopotamya Sema Bîngol, welatîyê bi nameyê Berfîn Guneş, Feza Gencay, Tunç Sarp, Zehra Camci û Can Bolatca dimayê karûbaranê kontrolê nêweşxaneyî ameyî veradayene. Ame zanayene ke vizêr bi şewe zî di kesê ke destbendkerde bîyî, dimayê îfadeyanê Mudirîya Polîsan ameyî veradayene.
16 kesê bînî yê ke destbendkerde bîyî sewqê edlîye ameyî kerdene û karûbarê înan ê edlîye dewam kenê.
