Hûmara nê aşmî ya rojnameyê Komînalî ke Ewropa de weşanîyeno, bi manşetê “Komelo rêxistinkerde nêbo nêbeno!” vejîya. Rojnameyî hûmara xo ya çarine de nuşteyê Mustafa Karasuyî yo bi nê sernameyî kerd manşet.
Mustafa Karasu nuşteyê xo de bale anceno muhîmîya komun û komelo rêxistinkerde û vano: “Cuya ke tede komun çin bo, rastîye de komelkî nîya. Kapitalîzm mîyanê merdimayî de nêweşîyêka giran a ke komelkîbîyayîşî herimneno û zeh keno. Xelasîya naye zî tena bi felsefeyê komunalî û bi awankerdişê komunan beno.”
Mustafa Karasu sewbîna nuşteyê xo de hedîseyanê dinya û Rojhelastê Mîyanênî analîz keno. Têkilîyanê Ewropa-DYA ra têkilîyanê Îran-Tirkîya, Rojava û Rojhilatî ra heta Çînî çarçewayêka hîra de Şerê Dinya yo Hîrêyîn erjneno.
‘Eşkerayîyê Bahçelîyî nêyenê qebulkerdene’
Mustafa Karasuyî dîyar kerd ke Tirkîya her hetî ra mîyanê yew kaosê polîtîkî de ya û bale ant bêvengîya prosesê aştî ser o. Mustafa Karasuyî derheqê qiseyanê Devlet Bahçelîyî ser o wina vat: “Nuşteyê ke bi nameyê Devlet Bahçelîyî rojnameyê Turkgunî de vejîya, tede xeylê nakokî est bî. Çarçewayê nuşteyî tesfîyekerdişê Têgêrayîşê Azadîye ser o bi. Helwêstê derheqê Serekî de zî tena seba rolê tesfîyeyî amebî îfadekerdene. Tu hetî nê vateyan nêyeno qebulkerdene.”
Seba ke manîfesto hîna rind bêro famkerdene
Rojnameyê Komînalî hirê hûmaranê xo yê verênan de Manîfestoyê Komelî yo Komunal ê Demokratîkî weşanabi. Hûmara çarine de zî seba famkerdişê sernameyanê nê manîfestoyî ca da nuşteyanê neweyan.
Nuşteyê ke na hûmare de ca girewtê wina yê: Analîzê Akademîya Zanistanê Komelkî yê Rayberê Şarê Kurdî Abdullah Ocalanî ra sernameyê “Demê eksenî de têgêrayîşê komûnalî”, nuşteyê Erdal Tolhildanî yê “Têkilîya fikir û komelkîbîyayîşî” , nuşteyê Halîl Cemalî “Komelê demokratîkî rê ewnîyayîşo tarîxî ” , nuşteyê Sînan Şahînî “Sey formêko musayîşî fikro mîmetîk” û nuşteyê Cemal Şerîkî “Demê hegemonya yê DYA wextê fermandarîya pereyan o” ca gênê.
Sewbîna rojnameyî de notê pêvînayîşê Heyetê Îmralî yê DEM Partî ke 24ê gulane de Rayberê Şarê Kurdî Abdullah Ocalanî reyde kerdbi, ê zî ameyî weşanayene. Pelo peyên de zî şîîra Ebdulla Peşêwî ya bi nameyê “Ta ku çirayê me geş nebe” est a.
