SOHRî eşkera kerd ke aşma gulane de pêroyê Sûrîye de 287 kesî merdê ke mîyanê nînan de 15 cinîyê est ê ke rîyê hedîseyanê tedayî yê cîya-cîyayan ra cuya xo ra bîyê.
Merkezê Çimdarîya Heqanê Merdiman ê Sûrîye (SOHR) raporê xo yê aşma gulana 2026î de eşkera kerd ke herêmanê cîyayan ê welatî de bi pêroyî 287 kesî merdê. Goreyê raporî, mîyanê nînan de 15 cinîyî est ê.
Goreyê daneyanê SOHR’î, qetilkerdişê cinîyan encamê hedîseyanê cîyayan ê tedayî de qewimîyayê. Cinîyêk zî pêkewtişanê zereyî yê herêmanê binê kontrolê rayberîya demkî ya Sûrîye de ameya qetilkerdiş, cinîyeka bîne bi guleyanê bêserûberan, cinîyêka bîne zî hedîseyanê cîyayan de ameya qetilkerdiş û cinîyêk zî bi hawayêko gumanbar cuya xo ra bîya.
Raporî de ame dîyarkerdene ke cinîyêk înfazî mezhebî de ameya qetilkerdene, 5 cinîyî qetilkerdişanê herêmanê ke binê kontrolê rayberîya demkî de ameyê kerdene, uca de cuya xo ra bîyê û herêmanê bînan de cinîyeka bîne zî bi hawayêko cîya ameya qetilkerdene. Cinîyêk encamê teqîyayîşê bombaya destî de merda û cenazaya 4 cinîyan zî goranê komkîyan de ameyê vînayene.
Teda û problemê ewleyî dewam kenê
SOHRî da zanayene ke na tablo problemê ewleyî yê ke welat de dewam kenê, estbîyayîşê grûbanê çekdaran û vilabîyayîşê çekan mojnena. Raporî de bale ameya antene ke teqemenî û mendeyê cebilxaneyî yê ke şerî ra mendê, hema zî seba sivîlan tehlukeyêko pîl ê.
Raporî de ame eşkerakerdene ke cinîyî û gedeyî grûbanê tewr zafan ê ke şer û zeîfîya ewleyî ra zerar vînenê, mîyanê înan de yê û çinbîyayîşê çareserîya sîyasî zî faktoranê serekeyan ra yew a ke hûmara merdeyan zêde keno.
Seba komelê mîyanneteweyî vengdayîş ame kerdene
Merkezê Çimdarîya Heqanê Merdiman ê Sûrîye (SOHR) seba komelê mîyanneteweyî reyna vengdayîş kerd û dîyar kerd ke ganî seba pawitişê sivîlan ê Sûrîye, qedîyayîşê teda û hesabpersayîşê merdimanê ke binpaykerdişê heqanê merdiman ra berpirsîyar ê, gamê hîna xurtî bêrê eştene.
