Hemserekanê Pêroyî yê Partîya Têduştî û Demokrasî ya Şaran (DEM Partî) Tulay Hatîmogullari û Tuncer Bakirhanî bi munasebetê Roşanê Qurbanî mesajêke nuştekî pare kerd.
Mesajê Hemserekanê DEM Partî wina yo:
“Ma hêvî kenî ke Roşanê Qurbanî bibo semedê destpêkerdişê wextêkî ke tede cuya demokratîke a ke tewr vêşî hewcedarîya ma pa est a xurt biba, huqûq edaletî vila bikero, azadîye serdest biba û nan bi hawayêko dadmend û seyyewbînî bêro parekerdene.
Nê rojanê tarîxî de ke ma Prosesê Aştî û Komelê Demokratîke ra ravêrenê, seba Tirkîya û Rojhelatê Mîyanênî çîyo tewr xêrin caardişê demokrasiyêka xurte û aştîyêka birûmet o. Awankerdişê aştîya komelkî bi hawayêko dadmend û heqane yo.
Bi hêvîya resayîşê ê rojan ke tede verê sîyaseta demokratîke de her astengî bêrê wedaritene û bingeyê hemwelatîya seyyewbînî ser o ameyoxêko azad û aştîyane bêro awankerdene.
Ma do seba awankerdişê ameyoxêko hempar û komelê demokratîkî xoverdayîşê xo bidomnê. Ma Roşanê Qurbanî yê pêro şaranê xo bimbarek kenê. Ma hêvî kenê ke no roşan bibo destpêkê cuyêka newa ke tede edalet, seypêyîye, demokrasîye û azadîye serdest biba.”
