Sazgehanê Dêrsimî DEDEF, DAM û Komela Dormeyî ya Munzurî û zafê komelanê dewan, seba zêdebîyayîşê aktîvîteyanê madenkarîye û talankerdişê xoza yê ke Dêrsim de benê, seba “Nobeta Xoza û Cuye” ya ke 24ê Gulane de dest pêkena, vengdayîş kerd.
Meclîsê Pawitişê Munzurî (DEDEF), Merkezê Cigêrayişanê Dersimî (DAM), Komela Dormeyî ya Munzurî û zafê komeleyanê dewan, seba zêdebîyayîşê aktîvîteyanê madenkarîye û talankerdişê xoza yê ke Dêrsim de benê, seba “Nobeta Xoza û Cuye” ya ke 24ê gulane de dest pêkena vengdayîş kerd û vat: “Vadîyanê Mercan û Havaçorî de vaş û fîdanê endemîkî binê tehlukeyê çînbîyayîşî de yê. Cografya cuye ya; cuye, bi pawitişê cografya mumkin a.”
Deklarasyonê pêroyî
Sazgehanê ke no eşkerakerdiş kerd, ard vîrî ke Dêrsim de 145 nuqtayan de projeyê madenî est ê û nê projeyî xoza talan kenê. Vengayîşî de ame vatene ke sey şaristananê bînan Îlîç, Koyê Qaz û Akbelenî, nika zî asayîşêko ekolojîk yo pêt seba Dersimî zî ferz beno.
‘Cografyaya Dêrsimî çin kenê’
Herême dinya de zey “Cayê xoza yo muhim” û “Cayê vaş û botanîk yo muhîm” ameya qebulkerdene. Eşkerakerdiş de nê nuqtayî vejîyayî vernî:
Vadîyanê Mercan û Havaçorî de vaşê zey sîrê koyî, ribês, gulheşî, gula adirî, gulike, sung û kofkarikî, anix û turşî(sumaq) seba tîcaretî zaf yenê arêkerdene û nê zî zerarêko gird danê ekosistemî.
Pawitişê xoza tena karê komeleyanê dormeyî nîyo, wezîfeyê her kesê ke na herême de ciwiyenê yê înan pêrûne yo.
Na nobeta ke kewte serra xo ya hîrêyine (3), amancê xo qedexekerdiş nîyo; amancê xo pawitişê cayanê cuye yê vadîyanê Mercan û Havaçorî yo.
Eşkerayîye vatena “Cografya cuye ya; cuye, bi pawitişê cografya cuye mumkin bena”, û “Dêrsim tena yê ma nîyo, wext û mêmandarîye de ameyoxê pêro ganîyanê ke tede ciwiyenê” qedîyaye.
