Endama PM’î ya ESP’î Beyran Taşkiran hêrişê Vakur û Rojhelatê Sûrîye ercna û vat: “Ma xoverdayîşê Tişrînî ewnîyenê nê zelal vînenê. Şar pêwa merdiş û her tewir hêrişî, her çî dano çiman ver.”
Hêrîşê Tirkîya yê serê Vakur û Rojhelatê Sûrîye dewam kenê. Sivîlê Awbendê Tişrînî nobete gênê, hedef yenê girewtiş. Bi seyan kesê ke çalakîya nobete de benê hedefê SÎHA’yê Tirkîya. Mîyan de rojnamegerî, cinî, tutî û hunermendî zî est ê, xeylêk kesî ameyî qetilkerdiş û bi desan ameyî birîndarkerdiş.
Endama PM’yî ya Partîya Sosyalîst a Bindestî Beycan Taşkiran derheqê hêrîşê serê Rojawanî de Jinnewsî rê ercnayîş kerd.
‘Wareyê cuye yenê bombavarankerdiş’
Beycan Taşkiran da zanayîş ke hêrişê hemverê Rojawanî dewam kenê û vat: “Ma Tişrîn de biewnê, gelo îradeyê aştîye ya dewlete est o? Bi rastî aştî û têduştî rojeve de ya? Ganî nê bêrê munaqeşekerdiş. Merdim uca de wareyê cuye de yenê bombavarankerdiş. Eynî wextî de Vakur û Tirkîya de zî operasyonê tasfîyeyê sîyasî yenê kerdiş.”
‘Cinî cepheyê vernî de ca gênî û xo ver danê’
Beycan Taşkiran da zanayîş ke ê sey şarî azadî û têduştî wazenê û wina vat: “Eke ma azadîye wazenê, no çî bi dewamkerdişê têkoşînî bi qerar o. Îradeyê dewlete yê nika yê semedê aştîya bi rûmet pratîkê ci de nêvejêno werte; wexto ke ma xoverdayîş û îradeyê Tişrînî ewnîyenê, bi zelalî vînenê ke şarê ma semedê nê şorişî gane verdo, pêwa birîndar û merdişan, pêwa her tewirê hêrişan, her çî keno tehluke. Tişrîn de nimûneyê pîlî yê lehengî û cesaretî est o. Tişrîn de qerardarîya xoverdayîşî yê bi ruhê Kobanê est o. Ma eşkerayîya înan de vînenê ke semedê şarê Sûrîye û Rojawanî de têduştî û xêrî çin o. Semedê şarê Sûrîye metodê tewr saxlem û azadîwaz, metodê Rojawanî yo. Cinî sey Kobanê, Tişrîn de zî vernê de xoverdayîş kenê.”
‘Ganî her kes têkoşîn bikero’
Beycan Taşkiran da zanayîş ke ganî xoverdayîş bêro pîlkerdiş û wina vat: “Eke ma butçeyê şer red bikerê, eke ma azadîye wazenê, ma waştişê cuyêka bi rûmet kenê, semedê nê cigêrayîşî lazim o şarê kurdî vengê xo berz bikero û goş bido vengê şarê ma yê Rojawanî û semedê aştîyêk bi rûmet têkoşîn bikero. Eke şarê Tirkîya na babete de ca bigîrê û aştîya bi rûmet ê şarê kurdî destê cuya hempar bigîrê ma eşkenê pîya ameyoxêke azad awan bikerê.”
