Stenbol – Hevberdevkê ANYAKAY-DERê ya Herêma 3yemîn ya Stenbolê Osman Ozdemîr derbarê 18ê Gulanê Roja Şehîdan de diyar kir ku di meha Gulanê de gelek cangorî çêbûne û wan cangoriyan gelê Kurd aniye roja îro û got: “Em bi serfirazî bi saya şehîdan dijîn. Şehîdên meha Gulanê em ji tunebunê anîn hebûnê. Ev tiştên ku em armanc dikin dê bi saya şehîdan û Serokatî pêk bê.”
Tevgera Azadiyê ya Kurdistanê weke tevgera şehîdan tê pênasekirin. Ji bo azadiya Kurdistanê hezaran kes canê xwe feda kirin. Dema ku meha Gulanê tê, şehîdên tevgera Kurdistanê tên bibîranîn. Di meha Gulanê de ji pêşengên Tevgera Azadiyê; Heqî Karer, Eşref Anyik, Ferhat Kûrtay, Mahmût Zengîn, Necmî Oner, Mehmet Karasûngûr û Halîl Çavgûn jiyana xwe ji dest dane. Lewma ev meh weke meha şehîdan tê zanîn. Hevberdevkê Komeleya Alîkarî û Piştevaniyê ya bi Malbatên Xizmên Xwe Winda Kirine re ya Anatolyayê (ANYAKAY-DER) ya Herêma 3yemîn a Stenbolê Osman Ozdemîr derbarê 18ê Gulanê Roja Şehîdan de axivî.
‘Bi bexwedana wan lehengan em hatine vê astê’
Osman Ozdemîr diyar kir ku di meha Gulanê de cangoriyên wan tên bîra wan û wiha got: “Meha Gulanê meha lehengî û berxwedanê ye. Şehîdan gelê Kurd ji tunebûnê anî roja îro. Li ser şehadeta Heqî Karer Tevgera Azadiyê hat avakirin. Şehîdên meha Gulanê şehîdên pîroz in. Îbrahîm Kaypakkaya jî bi berxwedana xwe tiştên gelek girîng kir. Îbrahîm Kaypakkaya jî şehîdê meha Gulanê ye. Çalakgerên çalakiya Çaran û Mehmet Karasûngûr şehîdên mezin in, gelek kes di meha Gulanê de şehîd ketin, wan şehîdan em anîn roja îro. Bi saya wan îro tevgera ku hatiye avakirin, bûye hezaran û ev pêvajo hatiye destpêkirin. Bi bexwedana wan lehengan em hatin vê astê.”
‘Tiştên ku em armanc dikin bi saya şehîdan û Serokatî dê pêk were’
Osman Ozdemîr destnîşan kir ku dewleta Tirk piştî serhildana Agiriyê goristaneke sembolîk çêkir û got ‘Kurdistan li vir veşartiye’ û wiha axivî: “Ew goristan bi têkoşîna şehîdan hate pûçkirin. Gelê Kurd xwe nas nedikir, têkoşîna ku hate dayîn gelê Kurd şiyar kir. Berî çalakiyên li Zindana Amedê, Kurdekî/ê nikaribû bêje ez Kurd im. Lê îro em bi saya şehîdan serfirazî dijîn. Ev tiştên ku em armanc dikin bi saya şehîdan û Serokatî dê pêk were.”
‘Divê aqûbeta windayan were aşkerekirin’
Osman Ozdemîr bi bîr xist ku gelê Kurd gelek êş kişandin lê her dem li ber xwe da û axaftina xwe wiha bi dawî kir: “Hestiyên zarokên me di qutiyan de dan me. Saziya me jî têkoşîna zarokên xwe didomîne. Bi sedan malbatên me hene ku bi aqûbeta zarokên xwe nizanin. Em jî weke saziya ANYAKAY-DERê dixwazin aqûbeta kesên winda derxin holê. Divê êşa di nava dilê dayikan de were sivikkirin. Divê dewlet komeleyên windayan esas bigire ku aqûbeta kesên winda were zelalkirin. Li Goristina Xerzanê gor hatin werankirin û hestiyên gelek kesan hate rewandin. Ev êrişa bêrûmetî li dijî malbatên me pêk hat. Ji vê girantir tiştekî din tune ye. Heke aştiyeke bi rûmet çêbibe zarokên ku winda ne divê aqûbeta wan werin diyarkirin. Weke tê zanîn 18ê Gulanê ‘Roja Şehîdan e’ em ê weke ANYAKAY-DER li Stenbolê li 3 navçeyan bernameya bîranînê li dar bixin. Li Sancaktepe, Beyoglû û Bagcilarê bernameya bîranînê li dar bixin.”
