Badê zîyaretê Duzgun Babayî yê Dêrsimî qezaya Bazarcixî ya Mereşî de Turbeya Elîf Ana zî raştê hêrişî ameya. Dezgehanê elewîyan vera cehdkerdişanê provokatîfan ê ke bawerîyan û haştîya komelkî hedef genê nêrazîbîyayîş mojna.
Mekanê Duzgun Babayî yo ke qezaya Qislê ya Dêrsimî de yo û semedê elewîyan merkezanê muhîman ra yew o, perey hetê kesanê ke nasnameyê înan bewlî nîyo, raştê hêrişî ame. Mekan de nîşaneyê bimbarekê ke sey ‘’rêça linge’’ yenê zanayene bi kendişî ameyî texrîbkerdene. Qezaya Bazarcixî ya Mereşî de zî vizêr serê sibayî Turbeyê Elîfe Ana de peykerê Mehmet Babayî raştê hêrişî ame. Çarçeweya cipersayîşî de şexso bi nameye M.S. Ç ke Semsûrî ra ameyo Bazarcix ame destbendkerdene.
Eşkerayîya ke hetê Europäische Initiative Maras e.V. (MARDEF) ra ameye dayene de ame vatene ke hêriş bîyo sebebê qesawet û dejê pîlî. Eşkerayîye de ame vatene ke hêrişkarî verî waşt zirar bido peykerê Elîfe Ana la nêeşka ser bikewo dima ra peykerê Mehmet Babayî da adirî ver û zirar da tay daranê dormeyî.
MARDEFî ke vera hêrişan hêrsê xo ard ziwan û seba ke hêriş sey ‘’kesêkê weşîya aqilê ci ca de nîyo, kerdo’’ ame mojnayene nêrazîbîyayîş mojna. Eşkerayîye de ame vatene ke hêrişkarî hêrişo plankerde kerd û seba ke nûqtayê asayîşî ra vîyarto ra nê zî şikî zêdînayî.
MARDEFî waşt wa serebut her hetî ra bêro cigêrayene û cipersayîşo zelal bêro kerdene.
Merkezê Kulturî yê Bazarcixî yê Mainzî zî hêrişê şermezar kerd û no sey provokasyonê vera bawerîya elewîyan û erjanê hemparan name kerd.
