TJA, bi munasebetê serrgêra şehadetê aye, şorişgir û pêşenga kurde Leyla Qasim yad kerd. TJA bale ant vindertişê Leyla Qasim yê vera zilmî û dîyar kerd ke aye têkoşînê azadîye de bîya sembolê îradeyê şarê kurdî û do her tim xoverdayîşê înan de bibe wayîrê cayêkî.
Leyla Qasim, 12ê gulana 1974î de bi destê rejîmê Îraqî ameye dardekerdene û tarîxê Kurdîstanî de sey “Bûka Kurdîstanê” û bêmerga doza azadîye cayê xo girewt. Têgêrayîşê Cinîyanê Azadan (TJA), hesabê xo yê medyaya dîjîtalî ser o bi munasebetê serrgêra şehadetê Leyla Qasim eşkerayîyêka nuştekî pare kerd.
TJA eşkerayîya xo de Leyla Qasim sey kêneka şarê kurdî pênase kerd û wina vat: “Leyla Qasim, têkoşînê azadîye yê şarê kurdî de sembolanê îradeyê teslîmnebîyayîşî ra yew a. Vindertişê aye ke serê sêdarê de zî rûmetê şarê xo pawitêne, vîrê xoverdayîşê vera zilmî de ciwîyena. Ma bi rêzdarî û minetdarî Leyla Qasim yad kenî. Aye do xoverdayîşê ma de her tim biciwîya.”
