Rêxistina DEM Partî ya Amedî derheqê rayîrşîyayîşo ke do 16ê gulane de bi sloganê “Gamêk seba Aştî” bêro kerdene, eşkeray daye û veng da şarî ke tewrê rayraşîyayîşî bibê. Eşkerayî de wina ame vatene: “Berzkerdişê têkoşînê aştî seba heme dînamîkanê komelkî wezîfeyêko mecburî yo. No wezîfeyê ma hemînan o ke ma aştî komelkî bikerê.”
Rêxistina DEM Partî ya Amedî derheqê rayîrşîyayîşê 16ê gulane de awanîya partîya xo de kombîyayîşê çapemenî organîze kerd. Rayber û endamê partîyanê sîyasîyan, dezgehê sivîlî yê şaristanî û xeylê kesî tewrê kombîyayîşî bîyî. Eşkerayî de bi kurmancî û Tirkî pankartê “Gamêk seba aştî” ame aliqandene. Metnê Tirkî hetê Hemserekê DEM Partî yê Amedî Abbas Şahînî ra û metnê kurmancî zî hetê Hemsereka DBP’yî ya Amedî Rûçem Vefa Elyakût ra ame wendene.
‘Proses ameyo vindertene’
Rûçem Vefa Elyakût ard vîr ke vengdayîşê Rayberê Şarê Kurdî Abdullah Ocalanî yê 27ê sibate ser ra 15 aşmî derbaz bîyî û vat: “Rixmê waştişanê biîsrarî yê şarê Kurdî, cinî, ciwan û kedkaran zî îqtîdaro sîyasî hema zî gamê şênberî nêeştê û proses ameyo vindertene.”
‘Dewlete berpirsşyarş nêgêna xo ser’
Rûçem Vefa Elyakût dîyar kerd ke komîsyona ke Meclîs de amebî awankerdene raporê xo amade kerd labelê waştişê demokratîkbîyayîşî nêameyê ca; aye wina vat: “Dewlete û desthilatdarî bi polîtîkayanê ‘taloqkerdişî’ nêzdîyê proseyî benê. Seba ke gan bido îmkananê tarîxîyan, ganî îqtîdar bi lez berpirsîyarî bigîro milanê xo ser. Wedaritişê nê vindertişî û nêzelalîye şertê tewr bingehîn ê.”
‘Aştî wezîfeyêko mecburî yo’
Rûçem Vefa Elyakût vat ke aştî zemînê hempar ê heme bawerî û nasnameyan o û wina dewam kerd: “Berzkerdişê têkoşînê aştî seba heme dînamîkanê komelkî wezîfeyêko mecbûrî yo. No wezîfeyê ma hemînan o ke ma aştî komelkî bikerê.”
Vengdayîşê rayîrşîyayîşê 16ê gulane
Rûçem Vefa Elyakût tewr peyên veng da şarî ke tewrê rayîrşîyayîşî bibê û vat: “Rayîrşîyayîş roja şeme saete 19:00î de Hepisxaneyê Amedî yê Rezanî ra heta vernîya Plazaya AZC ya Ofîsî bêro kerdene. Seba wedaritîşê nê xetimîyyaîşî û seba wayîrvejîyayîşê aştî, ganî heme şarê ma tewrê nê rayîrşîyayîşî bibo.”
