Endama Sekreteryaya Platformê Yewîya Cinîyanê Kurdan a Vakurî Sevîm Bîçîcî, bal ant rolê cinîyan ê awankerdişê yewîya neteweyî ser o û dîyar kerd ke ma do yewîya neteweyî kuçe bi kuçe awan bikerî.
Platformê Yewîya Cinîyanê Kurdan ê Vakurî serra 2017î de Amed de ameyo awankerdene. Platform, vengdayîşê Rayberê Şarê Kurdî Abdullah Ocalanî yê yewîya neteweyî ser o, xebatanê xo domneno. Goreyê daneyanê serra 2025î, platform de 180 cinîyî est ê. Nê cinîyan ra yew zî Hemşaredara Farqînî Sevîm Bîçîcî ya. Sevîm Bîçîcî derheqê xebatanê platform û muhîmîya yewîya neteweyî de ajansê ma rê qisey kerd.
‘Menfaatê pêroyî ameyî peygoşkerdene’
Sevîm Bîçîcî vat ke seba yewîya neteweyî bi serran o xebatî yenê kerdene û waştişê şarê Kurdî zî zelal o, labelê amancê dîyarkerdeyî hema tam nêameyê ca. Bîçîcî na babete ser o wina vat: “Zîhnîyetê kesayetî vejîyayo vernî. Reyna zîhnîyetê rêxistinî û partîyanê sîyasî kewtê vernîya menfaatanê pêroyîyan. Na rewşe bîya sebeb ke yewîyeya şarê Kurdî bi temamî nêra ca. Badê ke platformî xo eşkera kerd, xebatê ma bi taybetî hetê dezgehan û zîhnîyetê pederşahî ra rastê xeylê astengîyan ameyî.”
Xebatê dîplomasî û hîrabîyayîşê platformî
Sevîm Bîçîcî dîyar kerd ke vera heme astengîyan, înan her reng û fikrê cinîyanê Kurdan ra temsîlîyetêk awan kerdo: “Temsîlkarê heme bawerîyan, merdimê wayîrê fikir û rêxistinanê cîyayan tewrê xebatanê ma bîyî. Bi 101 delegeyan koordînasyon û sekreterya ameyê awankerdene. Zîyaretê Başûrê Kurdîstanî ameyî kerdene û Ewropa reyde têkîlîyî ameyî ronayene.”
‘Eke cêrî ra nêro awankerdene, corî ra nêbeno’
Sevîm Bîçîcî da zanayene eke yewîye tena çarçewaya partî û dezgehan de bimana û bi zîhnîyetê pederşahî bêra rayraberdene, do binkewo. Sevîm Bîçîcî wina dewam kerd: “Cinîyî wazenê yewya neteweyî bi her şeklî bêra caardiş. Ma nê fikrî kerd amancê xo; ganî yewîya neteweyî kuçe bi kuçe bêra awankerdene. Ma wazenê kulturê Kurdkî yê piştîdayîş û heskerdişî reyna geş bikerî. No ganî kuçe, taxe, qezayan ra dest pêbikero. Eke yewîye cêrî ra awan nêba, corî ra awan nêbena.”
‘Ma do kesê ke vernîya yewîye de asteng ê eşkera bikerî’
Sevîme Bîçîcî bal ant seserra newa ser o û vat: “Na seserre do biba seserra şarê kurdî. Nika ra pey, xebata ma ya tewr muhîme eşkerakerdişê nê dezgeh û kesayetan o ke vera yewîye vindenê. Ê kesê ke vanê ‘ma yewîye wazenî’ la pratîk de astengîyan vejenê, ma do înan şarî rê eşkera bikerî. Ma wazenîşar û cinîyê kurdî, Platformê Yewîya Cinîyanê Kurdan ê Vakurî sey keyeyê xo bivînê. Barê ma giran o, labelê ma paştîdayîşê şarî girewto û ma do yewîya neteweyî ya cinîyan teqez awan bikerî.”
