USS Gerald R. Ford badê wezîfeya 10 aşmî û rîyê problemanê teknîkî ra Rojhelatê Mîyanênî ra ancêna û agêrena Dewletanê Yewbîyayeyan ê Amerîka (DYA). Na game yena manaya kêmbîyayîşê gird ê hêzanê Amerîka yê herême ke şerê Îranî dewam keno.
Keştîya teyareyan a tewr modern û gird a hêzanê deryayî ya Dewletanê Yewbîyayeyan ê Amerîka USS Gerald. R. Ford Rojhelatê Mîyanênî ra ancêna û rojanê verênan de ver bi qerargehê bingehên ê Vîrgînîayî kewena rayîr. Goreyê agahîyanê ke hetê rayedaranê DYA ra ameyê dayîş, agêrayîşê keştî badê wezîfeyêka derg û rîyê problemanê teknîkî ra mecburî bîyo.
Eşkerayî de, keştîya ke nêzdîyê 10 aşmî yo ke derya de ya, lazim o ke bêra ciewnîyayene û başkerdene. Normal demê wezîfeyê keştîyanê teyaran 6-7 aşmî yo la Ford nê demî ra zêdeyêr mend.
USS Gerald R. Ford hîrê keştîyanê teyareyan ê şerî yê DYA ra yew bî ke herême de ameybî bicakerdene. Bi ancêyayîşê keştî, hêzê hêrîşî yê Washîngtonî yê Rojhelatê Mîyanênî do xeylî kêm bibo.
Ford, şerê Îranî ra ver qeraxê Venezuela de operasyonî de bîye û dima ra çarçewaya şerê Îranî de Rojhelatê Mîyanênî de ameye wezîfekerdene.
Mesrefê şerî zêde beno
Heto bînî ra, Pentagonî eşkera kerd ke malîyetê şerê Îranî DYA ser o resayo 25 mîlyar dolarî. Ame vatene ke zafêrê mesrefî cebilxaneyî rê bîyo.
