Verfeka DEM Partî Ayşegul Dogan, derheqê kombîyayîşê MYK’yî de qisey kerd. Dogan dîyar kerd ke rojevo sereke yê kombîyayîşê partîya înan ko de kongre bîyo û wina qisey kerd: “Amadekarîyê ma yê kongre dest pêkerdê. Roje hema dîyar nîya la aşma êlule yan zî teşrîna verêne de ma do kongreya xo bikerê.”
Verfeka DEM Partî Ayşegul Dogan, derheqê kombîyayîşê Komîteya Rayberîya Merkezî (MYK) yê DEM Partî de, merkezê pêroyî yê partîya xo de kombîyayîşê çapemenîye viraşt. Ayşegul Dogan îfade kerd ke kombîyayîşê MYK’yî dewam keno û derheqê rojevê kombîyayîşî de wina vat: “Prosesê Aştî û Komelê Demokratîkî, merhaleya ke ma resayî ci, rojevê ma yo sereke yo. Hedîseyê dosyaya Gulîstan Doku, hêrişê vera mekteban û krîzê ekonomî zî rojevê ma de bîyî. Reyna, newera awankerdişê partî, kongre û konferansî zî babetê kombîyayîşê ma bîyê.”
Amadekarîya kongre
Ayşegul Dogan wina domna: “Amadekarîyê kongre dest pêkerdî. Ma do aşma êlule yan zî teşrîna verêne de kongreya xo virazî. Kongre ra ver, ma do heme şaristanan de konferansan virazê û pêşnîyaranê şarî bigîrî.”
Çalakîya karkeran
Ayşegul Dogan karkerê madenî yê ke Anqere de grev de yê silam kerdî û vat: “Karkerî 6 rojî yo grevê veşanîye de yê. Ganî heqê înan bêro dayene. Ma heta peynî hetê karkeran de yê.”
Kombîyayîşê şarî û prosesê aştî
Ayşegul Dogan dîyar kerd ke aşma gulane de do şarî reyde bêrê têhet û peynî de vat: “Seba aştî ganî gamî hîna lezî bêrê eştene. Vengdayîşê Birêz Abdullah Ocalanî zaf muhîm bîyê, ganî no firsend weş bêro şuxulnayene.”
