Yemoş Gokmene verî weşîya xo dewa Mîrîga Heyderî de ramitêne ke girêdayeyê Dêrsimî ya. Wexto ke dewlete dewê Dêrsimi kerdê tal û veşnayê dewa înan zî veşnenê. Ê zî bêçare manenê bar kenê yenê Gazika Dêrsimî û reyna heywanan kenê weye. Cayê dewa Yemoşe hetê aye de cîya yo, wina vana: “Ma verî feqîr û hêsîrtîye antêne, oncîya kî pîr û talibî ameyêne, şîyêne.”
Yemoş Gokmene nika weşîya xo taxa Dêrsimî Gazîke de ramnena. Wexto ke dewlete 94î de dewa înan veşnaya, bar kerdo ameyê taxa Dêrsimî Gazike. Dima ra ke hebê îmkanê şîyayene virazîyayê, ê zî peyser şîyê dewa xo. Qaytê mal û dewaranê xo kenê. Yemoş Gokmene ajansê ma rê dewa verêne û wexto nikayin ser qisey kerd.
‘Wexto verên zaf rind bi’
“Nameyê dewa ma Mîrîga Heyderî ya. Dewijê ma zaf rind bîyê. Cîranî jûbînî rê rindî bî. Qul qulî de merdêne. Dewî ke kerde tal, her ju şi cayêk. Îtîqatê ma rind bi. Seweta domananê koyî ra, eskerî ma dewe ra vetîme. Dewa ma kerde tal, perûne bar kerd şî. Şarê ma dewarê xo eştî awe. Çîyê ke dest de mendî, ê zî bê pere şî. Dewa xo de genim ramitêne, cew ramitêne, vaş zaf bî. Ju ke debarê xo ra feqîr bî, dewijan pêrûne paştî dayêne ci. Keyeyê kalikê mi, keyeyê cematî bi, cîranî kerdêne aşt. Keyeyê ma, cayêde jîyar bî. Emser bojîyê mî şikîya, mi qurbana Xizirî nêkerda. Verî ma qurbanî kerdêne, nîyaz pewtêne, gûlbang dêne, şîyêne jîyarû ser. Çend serrî yo ke ma nêşîyê dewa xo. Panc domanê mi est ê. Weşîya xo bi weyekerdena heywanî ramenê. Dewa verêne de, vas bê pere bî, sîmer bê pere bî, velg û kolî zaf bî. Zereyê sûke de çîyê ke gêna peroyê xo bi herênayîş ra beno. Îdare nêbeno.
‘Sarê ma îtîqatê xo sas kerdo’
Sarê ma raya xo vurna, pîrê xo, talîbanê xo nas nêkenê, xo vîrî ra kerdê. Ma verî feqîr û hêsîrtîye antêne, oncîya kî pîr û talibî ameyêne, şîyêne. Ma nika çi bekesîye vînenîme heq zano.”
