Rêxistina Şaristanî ya Stenbolî ya DEM Partî eşkera kerd ke 1ê Gulane de do Kadikoy de bibê û veng da derûdoran ke waştişê heqanê karkeran, aştî û demokrasî kenê ke bi girseyî beşdar bibê.
Rêxistina Şaristanî ya Stenbolî ya DEM Partî kombîyayîşêko çapemenî bi sloganê “Seba Nan, Aştî, Edalet Heme Pîya Ver bi 1ê Gulane” viraşt û planê 1ê Gulane eşkera kerd. Kombîyayîşî de temsîlkarê partîyanê sîyasîyan ê cîyayan, sendîkayî û rêxistinê cinîyî zî beşdar bîyî.
Hemsereka Şaristanî ya DEM Partî ya Stenbolî Arîfe Çinar bale ant zêdebîyayîşê feqîrîye û bêemnîyetîye ser o û vat: “Seba aştî û komelê demokratîk ma do vengê xo berz bikerê.” Arîfe Çinar dîyar kerd ke bi xebatanê ke taxan de yenê ramitene, şarî 1ê Gulane de dawetê Kadikoyî kenê.
Partîya Awankerdişê Sosyalîstî ya Newa (SYKP) ra Alî Gençî bale ante Prosesê Aştî û Komelê Demokratîk ser o ganî gamê şênberî bêrê eştene. Temsîlkarê Platformê Paştîdayîşî yê Sosyalîstan (SODAP) Mustafa Ozturkî zî venga herkesî da ke beşdarê 1ê Gulane bibê.
Seyfettin Gulenyuzo ke nameyê Komîsyonê Kede yê DEM Partî ser o qisey kerd, dîyar kerd ke şer û krîzê ekonomîk tewr zaf karkeran ser o tesîr kerdo. Gulenyuzî vat aştî seba karkeran qasê “nan” muhîm a û seba komelêko seypê û demokratîk têkoşîn do bêro girdkerdene.
Eşkerayî de bale ame antene ser o ke krîzê ekonomîkî ke şerî viraşto, qewetê herînayîşî kêmî bîyo û şertê cuye bîyê zehmet. Mesajê “ne feqîrîye ne şer” ame dayene û ame îfadekerdene ke têkoşînê aştî û kede do pîya bêrê ramitene.
DEM Partî dîyar kerd ke seba heqê asgarî, bêkarîye, keda cinîyan, problemê xoza û heqanê demokratîkan 1ê Gulane de do waran ra bibê û vengdayîş wina bî:
“Seba ke ma zulm û kedewerîye ra vajê bes, 1ê Gulane de ma waran ra yê! Hem çar hetanê welatî ra hem zî Stenbol de seba 1ê Gulane yo xurt hazirîyê ma dewam kenê.”
