Mexdûra erdlerzî Meryem Kutlu Dîkmeceyî de konteynir de pêwa probleman hewl dana ke cuya xo dewam bikera û wina vat: “Problemê elektrîk, weşî û vurnayîşî qet nêqedîyayî. Sewbîna lazimîya ma bi paştdayîşê psîkolojîk est a.
Problemê ke badê erdlerzê 6ê Sibate rî dayî, her roja ke derbaz bî, cinîyan ser o hîna zêde bî giran. Kesê ke hema zî konteyniran de ciwîyenê, problemanê pîlan dir rî bi rî yê. Problemê ke ganî hetê dewlete ra bêrê çareserkerdiş, yenê peygoşkerdiş. Mexdûrê erdlerzî û bi taybetî zî cinî hewl danê ke bi îmkananê xo probleman çareser bikerê la qîm nêkeno.
Mexdûra erdlerzî Meryem Kutlu Dîkmece de konteynir de hewl dana ke cuya xo dewam bikero. Derheqê cuya xo û problemê ke ciwîyena de ajansê ma JINNEWS’î rê qisey kerd.
‘Ma pawe bî ke tîje vejîya la qet nêvejîya’
Meryem Kutlu, dîyar kerd ke keyeyê aye erdlerzî ra xeylêk mexdûr bîyo û vat: “Wexto ke erd lerza ez û mêrdeyê xo, di tutanê xo dir keyeyê xo yê Dîkmeceyî de bîyî. Ma bi zorî keye ra vejîyayî. Badê ke ma vejîyayî dêsî teqîyayî û ma bi saetan verê varanî de mendî. Badê pêro nas û dostî ameyî verê ma, ma pawe bî ke tîje vejîya la tîje qet nêvejîya. Badê roşnî ma dî ke çiqas felaket virazîyayo. Ma waşt biresê merdimanê xo la şebeke pêro rijyabî. Ma nêresayî tu kesî. Heta ewro zî ma û tutî bi vengêke qij, erdlerzêk yan zî birnayîşê ceyranî ra tersenê.”
‘Kesî persê ma nêkerd’
Meryem Kutlu dîyar kerd ke qonaxê ewilî yê erdlerzî de tu kesî hetkarîya înan nêkerda û vat: “3 rojê destpêk de ma kesî ra xebere nêgirewte. Ma dewe de ciwîyenê, kes nêame û nêşî. Ne cendirme û ne zî şar ame hetkarî. Bi îmkananê xo ma verê keyeyî de çadirêke awan kerd, qîmê 3-4 keyeyan kerd. Ma bi dore çadire de rakewtî. Semedo ke cayê rakewtişî çin bî. Badê demêk helîkopterêk ame. Ma rê werd, şit, ped û destmal hewa ra eşt û şî. Çîyo ke hîrê rojan qewimya no bî. Ma bi îmkananê xo çend aşmî çadirêke de mendî. Min û mêrdeyê xo badê 5-6 aşman ma bi îmkanê xo konteynirêk peyda kerd û ma nê konteynerî de ca bî. Çîyêk tehluke yo ke 4 kes cayêk wina qij de tutan dir biciwîyê. Hem hetê psîkolojîk û hem zî hetê fizîkî ra ma rijna. Semedo ke no wareyê tengî de wendiş, werd û pakkerdiş tutan dir zaf zehmet o.”
Konteynir de îmtîhano xidar ê cinîyan
Meryem Kutlu dewam de wina vat: “Cinîyan zaf zehmetî ant. Semedo ke ma pakitî, werd û ewnîyayîşê tutan ra berpirsiyar ê. Ma her çî ra berpirsiyar ê. Bi ser de zî ma verê erdlerzêk vîna. Psîkolojîya ma xirab bî. Nika tutî şinê mekteb, westayî agêrenê. Problemê înan ê werdî est o. Pî kar ra ameyo û wazeno boya xo bido. Televîzyonêk qij est o, sey nimûne, o wazeno televîzyon temaşe bikero, la tutê ey mecbûr ê ke dersan virazênê. Ti nêeşkena mêrdeyê xo ra çîyêk vajê. Şima zanê, yew-di kes yenê û wazenê ma bivînê la ca çin o. Yan zî kesêk bêro tutî êdî nêeşkenê dersanê xo viraznê. Xêrcê nê ma û tutî, eynî cayî de nişnenê ro. Xeylêk cinî yê derûdorê mi nê problemî dir rî bi rî yê.”
Elektrîk-weşîye-vurnayîş
Meryem Kutlu, tewr peyîn wina vat: “Problemê ma yo tewr pîl o yo ke hema zî elektrîk çin o. Ez keyeyê ke newe TOKÎ ma rê vejîyayo yena. Ma hewl danê ke uca de ca bibê. Elektrîk xeylê wext çin o û cuya ma felç kerdo. Sewbîna perwerde û weşîye zî felc keno. Nêweşxaneyêk awan kerdî, la semedê elektrîk û problemê girêdayîşê înternetî yê nêweşxaneyî sîstemê weşîye yeno astengkerdiş. Ma nêeşkenê ximet bigîrê. No birnayîşê elektrîkî bi rastî semedê îşkencekerdişê ma yo? Wina aseno. Ma konteyner de bi sobeya elektrîkî xo germ kenê. Bi rastî ma nêeşkenê xo germ bikerê, ma cemidyenê. Ma keye de timî çend qatî cilan danê xo ra.”
